Атырауда күн жылып, қармаққа балық іліне бастады. Балықтың жайын біз Атыраудағы Балық шаруашылығы ғылыми-зерттеу орталығының директоры Ерболат Қадимовтан сұраған едік, деп хабарлайды AtyrauPress тілшісі.
Су температурасының жоғарылауы балықтардың уылдырық шашуы мен көші-қонына әсер етеді.
«Бұл жерде мынаны түсіну керек, миграция мен уылдырық шашу – әртүрлі процестер. Мысалы, бекіре балықтары уылдырық шашудан әлдеқайда бұрын өзендердің жоғары ағыстарына бағытталып, терең шұңқырларға түсіп, уылдырық шашу үшін ең қолайлы температураны күтеді. Көптеген балықтардың ең оңтайлы температуралық диапазоны – 12-20 градус. Су температурасы сондай-ақ шабақтардың шығу уақытын да анықтайды. Бұл процесс жаздың ортасына, әдетте маусым айының басында басталады, өйткені осы уақытта шабақтардың тіршілік етуі үшін қолайлы жағдайлар туындайды.
Ерте көктемде бекіре, көксерке, қойбалық, шортан мен қарагөздердің көші басталып кетті. Олардың әрқайсысына лайық келетін ауа температурасы бар: қарагөз – 8-10 градус; қойбалық – 6-10 градус; табан – 11-23 градус.
Ал, кейбір балықтар үшін көші-қон үрдісі әлі басталған жоқ. Оны алдағы уақыт пен табиғат жағдайы көрсетпек.
Амандық САҒЫНТАЙҰЛЫ
https://atpress.kz/kk/news/ekologiya/atyrauda-k-armak-k-a-balyk-t-sip-zhatyr?fbclid=IwY2xjawI9X7BleHRuA2FlbQIxMQABHcodiay6guSFzHVcOzNhEtUUovyH-3aHteAlm1JCFwstQtX8pAbkVW25CQ_aem_8gWtrkOJK6BNrDViynl2tA
atpress.kz
