«Тараз» ӘКК» АҚ мәліметінше, 2025 жылы «Ауыл аманаты» бағдарламасы аясында жалпы сомасы 3,7 млрд теңгеге 518 жоба қаржыландырылды. Бағдарлама ауылдық жерлерде шағын кәсіпкерлікті дамытуға бағытталып, бизнес-жобалардың 110-нан астам бағытын қамтыды, деп хабарлайды baq-orda.kz.
Қаржыландырылған жобалардың қатарында техникалық қызмет көрсету станциялары, тігін цехтары, жылыжайлар, жиһаз цехтары, құм блоктары мен кірпіш өндірісі, өзіне-өзі қызмет көрсететін автокөлік жуу орындары, сұлулық салондары, наубайханалар, сүт өңдеу цехтары және балабақша ашу бағыттары бар. Аталған жобалар ауылдық жерлерде кәсіпкерліктің дамуына серпін беріп, жаңа өндірістік бағыттардың қалыптасуына мүмкіндік жасауда.
Бағдарламаны іске асыру нәтижесінде 500-ден астам ауыл тұрғыны тұрақты жұмыспен қамтылды. Сонымен қатар жаңа өндірістік желілерді іске қосуға мүмкіндік беретін өндірістік тізбек қалыптасып, ішкі нарықты отандық дайын өніммен қамтамасыз ету жұмыстары күшейтілуде.
2026 жылы «Ауыл Аманаты» бағдарламасы аясында 5 млрд теңге игеру жоспарланып отыр. Басым бағыттардың қатарында бизнес-жобаларды қаржыландыру, кооперативтер құру, ауыл шаруашылығы өнімдерін қайта өңдеуді дамыту және су үнемдеу технологияларын енгізуге арналған жабдықтар сатып алу қарастырылған.
