2025 жылғы 11 қараша күні сағат 11:07-де Байзақ ауданының Мырзатай ауылында орта мектеп оқушыларының тағамнан улану оқиғасы тіркелді.
Аудандық орталық аурухананың мәліметінше, 11 қараша таңертең балалар мектептің қарсы бетіндегі жеке дүкеннен сатып алған жылдам дайындалатын тағамдарды(сэндвич, бургер, кириешки) тұтынған. Арада 1–2 сағат өткен соң балаларда жүрек айну, құсу, бас ауруы және әлсіздік сияқты улану белгілері байқалған.
Барлығы 12 оқушы Байзақ аудандық орталық ауруханасының жұқпалы аурулар бөлімінде тексерістен өтті. Балалардың жағдайы тұрақты, нашарлау белгілері жоқ.
Қазіргі уақытта науқастарға тиісті ем-шаралар көрсетілді. Зертханалық тексерулер жүргізіліп, уланудың себебі анықталуда.
Облыс әкімінің тапсырмасына сәйкес, облыстық білім басқармасының басшысы, аудан басшылығы оқиға орнына барып, тиісті шаралар қабылдауда.
Жағдай тұрақты, бақылауда. Балалар үйлеріне қайтарылды.
Құрметті ата-аналар!
Балаларыңыздың денсаулығын сақтау мақсатында: мектеп маңындағы дүкендерден және белгісіз сатылым орындарынан алынатын тез дайындалатын тағамдарды тұтынуды шектеуді, үйден қауіпсіз және балансты тамақ беруді, балаларыңызға дұрыс тамақтану мәдениетін түсіндіруді сұраймыз.
Балалардың денсаулығы – бәріміздің ортақ жауапкершілігіміз. Сіздердің түсіністікпен қарауларыңызға сенеміз.
