Алғыс айту күні мерекесіне орай, Достық үйінде «облыстық Махмұт Қашқари атындағы ұйғыр этномәдени бірлестігінің» ұйымдастыруымен «Біз-Қазақстан халқымыз» атты ашық есік күні өтті.
Шараға этномәдени бірлестіктердің басшылары мен мүшелері, облыс әкімі аппаратының «Қоғамдық келісім» мекемесі қызметкерлері, «Жаңғыру жолы» жастар қозғалысы, «Ақ желкен» жастар лигасы, «Айбын» әскери-патриоттық клубының белсенділері мен қала тұрғындары қатысты.
Ашық есік күніне арналған шаралардың басы ұйғыр этномәдени бірлестігінің төрайымы Мухабат Тұрдыеваның жастармен кездесуінен басталды. Әр этнос өкілдерінен құралған жастарға бірлестік басшысы Махмуд Қашқаридың өмірбаянынан сыр шертіп, Достық үйінде орналасқан ұйғыр этносының шағын мұражайын таныстырды. Онда қойылған әрбір зат ұйғыр халқының өзіне тән құндылықтарын айшықтап тұр.
– 2016 жылдан бері көктемнің алғашқы күнінде Қазақстан ризашылық күнін атап өтіп келеді. Бұл қазақ халқының қонақжайлығы мен кең пейілі үшін өзге этнос өкілдерінің алғыс айту күні. Көпшілік жаппай жер аударылған жылдарда ас-ауқаты мен жылы-жұмсағын, ұлы даласынан жайлы қоныс берген қазақ халқына деген ризашылық білдіру күні. Осынау нәубетті жылдарда өздері қиындыққа душар болғанына қарамастан қазақтар өзгені өзекке теппей, бір үзім нанымен бөлісіп, өзге ұлт өкілдерін туысындай бауырына басты. Бұл тарих жылнамаларындағы бірнеше ұлттың бірігуінен құралған күрделі кезең. Міне, қазақ халқының осынау жақсылығы үшін атқарып жатқан әр іс-шарамызда жас ұрпақты сабырлы, бауырмал, Қазақстандағы ұлтаралық келісімді және этносаралық қарым-қатынасты нығайтуға бағыттап отырамыз, – дейді Мухабат Абдрахманқызы.
Мұражай таныстырылымы аяқталғаннан кейін , бейбітшілік пен келісім туралы дәрістер оқылып, жиылған жастарға құрылғанына 30 жыл толып отырған «облыстық Махмұт Қашқари атындағы ұйғыр этномәдени бірлестігінің» тыныс-тіршілігі тереңірек баян етілді. Сонымен қатар осынау дәріс арқылы ұйғыр этносының төрайымы жастарға өмір сүруге талпыныс, арман-мұратқа жетуге құлшыныс, үшкен-кіші, елімізді мекен еткен барша этнос өкілдеріне сый-құрмет көрсету, егемен елдің ұрпақтарына тән рухани азық болар мотивация сыйлады.
Жиын соңында Мухабат Абдрахманқызы жастарға Алғыс айту және Ассамблея күніне арналған қайырымдылық түскі асын берді. Ас үстінде ұйғыр этномәдени бірлестігінің жұмысы туралы видео-роликтер көрсетіліп, естелік суреттерге түсті.
Жамбыл облысы әкімі аппаратының
«Қоғамдық келісім» КММ
баспасөз қызметі
