Азаттық алғалы біздің еліміз дамыған елдердің қатарына кіруге талпынып келеді. Сол үдеден шығу үшін жаңа қала салып, инфрақұрылымдарды жаңғыртып, тың технологияларды игеру жолында тер төгіп жүр. Қанша дегенмен қазақ өз тамырынан ажырамай, ата-баба дәстүрлерін берік сақтап, мәдениетін дәріптеу керек екені екі бастан белгілі. Бүгінгі күні ғұрпын ғұмырына азық қып, өзегінен алыстамаған жандарды ауылдан адаспай табуға болады.
Осыған орай, Қазақстан Республикасы Тәуелсіздігінің 30 жылдығы қарсаңында аудандық Мәдениет үйінде 3 күн ішінде «Туған жерім-дархан далам» атты іс-шаралар өтіп, ауылдық округ тұрғындары қонақжайлық танытып, толысқан мәдениетін таныстырып, ғасырлық ғұрыптары мен халқымыздың дәстүрлерін көрсетуге мүмкіндік алды. Өткізілген шараның басты мақсаты — жастарды туған өлкесін тануға, оның терең тарихын құрметтеуге шақыру екенін айта кеткен жөн.
Іс-шараның алғашқы күні Балуан Шолақ пен Бәйдібек ауылдарының тұрғындары өз шеберліктерін көпшілікке ұсынды. Кіре беріске көрме ұйымдастырылып, оған жергілікті шеберлердің жұмыстары қойылды. Атап айтқанда, түрлі ағаш бұйымдары, картиналар, кілемдер мен көрпелер көздің жауын алды. Одан бөлек, дихандардың еңбегі де елге ұсынылып, егіннен шыққан өнімдер өңірдің топырағының құнарлы екендігінен хабар берді. Көрме барысында ауылдықтар қазақша күрес, тоғызқұмалақ, «бес тас», асық ату сынды ұлттық спорт пен ойын түрлерін көрсетіп жатты. Шара соңында ауылдық өнерпаздар әннен шашу шашып, мың бұралған бишілер мен ұлттық нақыштағы киімдер мерекенің көркін ашты десе болады. Патриоттық бағыттағы әндер де ұмыт қалмады.
Келесі күні Қорағаты және Ақтөбе ауылдық округтері тұрғындарының сазды бағдарламалары паш етілді. Бұл ауылдардың бастамасы көпшілікті тәнті еткені анық. Дәстүрлі әндер айтып, сән-салтанатымен жеткен күймені Мәдениет үйінің алдында қызғалдақтай құлпырған қыз-келіншектер қымыз бен шұбат ұсынып, құрт беріп қарсы алғаны көрермендерге ерекше әсер сыйлады. Бұл шараларға «Nur Otan» партиясы аудандық филиалы төрағасының бірінші орынбасары Болатхан Ниязбеков қатысқанын айта кеткен жөн. Қызықты қойылымнан кейін Жамбыл Жабаевтың 175 жылдығы, М.Мақатаевтың 90 жылдығы, Егемендіктің 30 жылдығына арналған көрме қойылды. Онда екі ауылдың оқушылары жасаған бұйымдары, Раис Жандосов атты шебердің ағаштан жасалған туындылары, ұлттық дәмдер мен киіз үйдің ішкі жабдықтары көрсетілген болатын. Сонымен бірге ақ жаулықты аналарымыз қазақы дәстүрлерді таныстырып өтсе, Болатхан Ниязбековке тұсау кесу құрметі бұйырды. Болатхан Кемелбайұлы балдырғанның тұсауын кесіп, болашағына бақыт тіледі. Іс-шара соңы сазды бағдарламаға ұласып, өнер-паздар өнерлерін ортаға салды.
Ал, үшінші күні дәл осындай сөлді салмақты шараны Алға және Тасөткел ауылдық округтері өткізіп, жұртшылықтың ыстық ықыласына бөленді. Қос ауылдың өнерлі жандары Мәдениет үйін әсем әнмен көмкерді.
