Елдің дамуы еңбекке байланысты

Мейрамбек Мылтықбайұлы, аудан әкімі Қанатбек Мәдібек және жауапты сала басшылары алдымен «Шолақтау» тау-кен өңдеу кешенінде болып, жұмысшылармен кездесті.

Жалпы, тау-кен өңдеу кешенінде 500-ден астам адам жұмыс жасайды. Кәсіпорынның құрылтайшылары өзгергелі мұнда жұмысшылардың да біршама жағдайы жақсарған. Еңбекақы көлемі көтерілген. Одан бөлек, желтоқсан айында «ҚазФосфат» мекемесі 3 мөлтек ауданындағы «Бастилия» аталып кеткен 72 пәтерлі тұрғын үйді толықтай жөндеуден өткізіп, мекемедегі баспанаға мұқтаж және көпбалалы отбасыларына берген. Көппәтерлі үйдің құрылысына кәсіпорын есебінен 1,2 млрд. теңге қаражат жұмсалған. Сонымен қатар, үй іргесінен балаларға арналған спорт алаңының құрылысын аяқтап, ел игілігіне ұсынған.

— Жаңа Қазақстанның міндеті — халықтың әл-ауқатын арттыру. «Қаңтар оқиғасы» барлығымызға сабақ болды. Бейбіт шерумен басталып, қарулы қақтығысқа ұласты, қан төгілді. Пиғылы бөлек лаңкестер бейбіт шеруді өз пайдасына жаратқысы келді. Ешкімге оңай болған жоқ. Алайда, 5 қаңтарға дейінгі Қазақстан мен бүгінгі елімізді салыстыруға келмейді. Көп дүние өзгерді. Алдымызды қыруар жұмыс күтіп тұр. Барлығы елдің игілігі үшін жасалмақ. Біздегі басты мәселе жұмыссыздық, жемқорлық және кедейшілік. Алғашқы кезекте осы мәселені шешуді қолға алмақпыз,-деген Мәжіліс депутаты ел игілігіне еңбек ету ортақ жауапкершілік екендігін алға тартты.

Кездесуде тау-кен өңдеу кешенінің геологі Әбілхайыр Көлжанов, Күмісхан Байғараев Б.Қарашаұлы көшесіндегі жол сапасына, шахта жұмысшыларының жалақысына, маман тапшылығына және қаладан тау-кен мамандарын даярлайтын жоғары оқу орнын ашуға қатысты ұсыныс-тілектерін білдірді.

 Көтерілген мәселеге байланысты сөз алған аудан әкімі:

— Өте орынды ұсыныстар айтылып жатыр. Биылғы жылға қалада 6 көше жөндеуден өтпек. Қазір оларға конкурс жарияланды. Оның қатарында Б.Қарашаұлы көшесі де бар. Рас, шахтада жұмыс жасау ауыр. Бұрындары кеншілерге «аудандық коэффицент» есебінде 60 пайызға дейін үстемақы төленетін. Қазір бұл еліміздегі кейбір кәсіпорындарда сақталғанымен, бізде қарастырылмаған,-десе, мамандар даярлауға қатысты сауалға облыс әкімдігі білім басқармасы бастығының орынбасары Талғат Жамалов жауап берді.

— Оқу орнын ашу бір бөлек. Ал, білім алып шыққан түлектерді жұмысқа орналастыру жағында ойластыру керек. Бір жылда 50 түлек бітірсе, оған ауданнан осынша жұмыс орны табылады ма? Керісінше, жұмыссыздардың көбеюіне алып келуі мүмкін. Қазір Қаратауда екі колледжді біріктірдік. Ондағы мақсат — білім мекемесінің материалдық-техникалық базасын нығайту. Қазіргі жас мамандар заманға сай жаңа технологияны игеріп жатыр. Өзіне таныс құрал-жабдықтармен жұмыс жасағысы келеді,-деді ол.

 Еркін форматта өрбіген басқосуда көпшілік тарапынан қойылған нан және такси қызметі құнына байланысты сұрақтарға да тиісті жауаптар берілді.

Талас ауданы әкімдігінің баспасөз қызметі