Әнші әлеуметтік желіде бауырлары туралы жазды.
«Бұл менің марқұм Қанат атты бауырым. Өзімнен үш төл кейін дүниеге келген бауырым болатын. Бүгін туған күні еді. Тірі болса 59 жасқа толып, келер жылы мен де 60 жасқа толамын деп, немерелерімен улап-шулап той қамын бастап та жатар ма еді. Өкінішті. Әрине бауырымыздың 60 жасқа толуы елеусіз қалмасы анық қой, дегенмен ортамызда болса, той төрінде отырса жарасар ақ еді дейміз де. «Дүние кезек»- дейді, бірақ кейде Алла кей пенделері үшін кезегін де жылжытып қойғаны өзегіңді өртеп түседі екен. 1993 ші жылы оқыс опаттан өзімнен кейінгі тетелес інім Ерлан қайтқанда, қабырғамыз қақырағандай күй кешкен едік, ал Қанат інімді 2020 жылы аты жаман кесел екі жыл айналдырып, көз алдымызда сөніп,солып бара жатқанын көріп отыру одан да ауыр болды. Амалының бәрін жасадық дегенмен, алып қалуға, ажалына араша түсе алмадық. Тура келген ажалы алып тынды. Өксідік. Жыладық. Өкіндік. Әйткенмен қолдан келер шара болмады. Тәубә артында ізі бар ғой деп өзімізді өзіміз жұбаттық. Бүгінде інімнің құндыздай-құндыздай үш қызынан болса да ұрпақтары өсіп келеді. Оншақты немерелері шауып жүр. Жат жұртта болса да, қыздарымыз өрісіміз ғой, өсіп-өніп отыр. Шүкір. Құдаларымызға мың алғыс, жиендерімізді жеткізіп, ұрпақтарының аман болғанына тілектестігімізді айтамыз. Жаның жәннәттің төрінде болсын, жан бауырым. Сен біздің мәңгі жүрегіміздесің», — деп жазды ол.
Ашық дереккөзден алынған
- https://turkystan.kz/article/255757-eleusiz-kalmasy-anyk-nurlan-onerbaev-kaitys-bolgan-inilerin-eske-aldy
