Биылғы оқу жылынан бастап барлық мектептер бес күндік жұмыс форматына көшеді. Бұл мектеп басшыларына, орынбасарларына және барлық педагог қызметкерлерге қатысты. Яғни, бұл мектепте жұмыс істейтін қызметкерлердің демалуына жағдай жасау.
Бұл туралы ӨКҚ баспасөз алаңында Жамбыл облысының білім саласында сапаны қамтамасыз ету департаментінің басшысы Ускумбаева Дамеш айтты. Ол Оқу-ағарту министрінің жаңа 2022-2023 оқу жылын бастау жөніндегі бұйрығы қабылданғанын да атап өтті. Жаңа оқу жылы 36 оқу аптасынан тұрады. Оқу жылы 1 қыркүйекте басталып, 31 мамырда аяқталады.
«Жалпы оқу күндері – 173 күнді құрайды, 1–11 сыныптарда: күзгі – 7 күн (31 қазаннан 6 қарашаға дейін), қысқы – 9 күн (31 желтоқсаннан 8 қаңтарға дейін), көктемгі – 9 күн (18 наурыздан 26 наурызға дейін), жазғы демалысты қоса есептегенде демалыс күндерінің жиыны 192 күнді құрайды. 1 сыныптарда қосымша демалыс – 7 күн (6 ақпаннан 12 ақпанға дейін)», — деді спикер.
Дамеш Шайхықызы «Білім және ғылым министрлігінің салалық көтермелеу жүйесін бекіту туралы» заңына толықтырулар енгізу туралы құжат қаралып жатқанын атап өтті. Өзгеріске сәйкес 25 жыл еңбек өтілі бар педагогтерге «Ұстаздық қызметіне адалдығы үшін» Құрмет белгісі берілетін болады. Оның мақсаты – 25 жылдық ерен еңбегін елеп, осы қызметте сіңірген үлесін ескеру және оған ризашылық білдіру.
Сонымен қатар, ол білім беру ұйымдары «Педагог мәртебесі туралы» Заңның және Білім және ғылым министрінің «Педагог құқықтарының бұзылуына жол бермеу туралы» №172 бұйрығының талаптарын қатаң сақтау талап ететінін жеткізді. Атап айтқанда, педагогтарды заңнамаға сәйкес әзірленген лауазымдық нұсқаулықтарда көзделмеген жұмыс түрлеріне тартуға; педагогтер жүргізуге міндетті құжаттар тізбесінде көзделмеген есептілікті не ақпаратты талап етуге; Әкімшілік рәсімдік-процестік кодексте көзделмеген тексерулер жүргізуге; тауарлар (заттар, бұйымдар) мен әртүрлі қызмет түрлерін сатып алу бойынша міндетті жүктеуге жол берілмейді.#ӨКҚ
