https://turkystan.kz/article/259700-elimizdegi-kolledzderdin-100-uzdik-studenti-marapattaldy
Оқу-ағарту министрлігінің ұйымдастыруымен бүгін «Қазақстан Республикасының колледждерінің үздік 100 студенті» республикалық байқауының жеңімпаздарын марапаттау рәсімі өтті, деп хабарлады turkystan.kz.
Бұл байқау республиканың түпкір-түпкірінен колледждердің ең үздік, ең талантты, ең дарынды студенттердің басын қосты.
Салтанатты шараға Оқу-ағарту министрі, ҚР Парламенті Сенатының депутаттары, бизнес қауымдастықтардың өкілдері, техникалық және кәсіптік білім беру ұйымдарының студенттері, педагогтер мен ардагерлер қатысты.
Бүгінде техникалық және кәсіптік білім беру саласы еліміздің білім беру экожүйесінде стратегиялық маңызға ие. Бұл жөнінде салтанатты рәсімде сөз сөйлеген Ғани Бейсембаев атап өтті. Министр үздік 100 студентті болашақтың құрылысшылары ретінде елге таныстыру, олардың есімдерін кеңінен дәріптеу, жастарға үлгі ету қажеттігін айтып, бұл бағытта жауапты құрылымдық бөлімшелерге нақты тапсырмалар жүктеді.
«Еліміздің болашағы – интеллектуалды, білімді, заманауи жастардың қолында. Сіздердің сапалы білім алып, халықаралық деңгейде бәсекеге қабілетті маман ретінде қалыптасуларыңыз – мемлекет назарындағы басты мәселе. Бүгінде техникалық мамандықтарға бөлінетін мемлекеттік тапсырыс жыл сайын ұлғайып келеді, студенттердің шәкіртақысы екі есеге артты. Сонымен қатар, білім алушыларға өз кәсібін бастауға, халықаралық сертификаттаудан өтуге барлық мүмкіндік қарастырылған. Жастарға бағытталған ірі жобалар мен бағдарламалар – еліміздің жарқын болашағына жасалған инвестиция. Кәсіпті игерген адам – бақытын табады. Сондықтан бұл жыл сіздер үшін үлкен мүмкіндіктер жылы», – деді министр.
Экономиканың түрлі салалары үшін білікті мамандардың кадрлық резервін қалыптастыру мақсатында алғаш рет ұйымдастырылған бұл байқауға еліміздегі техникалық және кәсіптік білім беру ұйымдарынан 2 мыңнан астам дарынды әрі кәсіби білікті студент қатысты. Өңірлерде өткен іріктеу кезеңдерінің нәтижесінде 200 үздік студент республикалық кезеңге жолдама алып, олардың арасынан 100 үздік жас марапатқа ие болды.
Байқау жеңімпаздары «Қазақстан Республикасының колледждерінің үздік 100 студенті» деректер базасына енгізіліп, жұмысқа орналасу үшін арнайы сертификаттармен марапатталды. Сонымен қатар олардың үздік жобаларын жүзеге асыруға қолдау көрсетілетін болады.
