Жамбыл облысының әкімі Ербол Қарашөкеев Бұқаралық ақпарат құралдары қызметкерлерінің күні қарсаңында өңірдің ақпарат саласында жемісті еңбек етіп жүрген журналистер мен медиа өкілдерін кәсіби мерекелерімен құттықтады.
Салтанатты жиында сөз сөйлеген өңір басшысы журналистиканың қоғамдағы айрықша рөліне тоқталып, бұқаралық ақпарат құралдарының мемлекет пен халық арасындағы сенімді байланысты қалыптастырудағы маңызын ерекше атап өтті.
— Сіздер мемлекеттік саясатты, елде жүзеге асып жатқан реформаларды халыққа жүйелі жеткізіп, билік пен қоғам арасындағы алтын көпір қызметін абыроймен атқарып келесіздер. Журналистер қауымы елдің тыныс-тіршілігін таразылап, шындық пен әділдіктің, ақиқат пен адалдықтың жаршысы болып келеді. Күнделікті еңбектеріңіз қоғамдық сананы жаңғыртуға, ұлттық құндылықтарды ұлықтауға, елдің бірлігі мен рухани тұтастығын нығайтуға қызмет етуде. Ақпарат саласында еңбек ету – үлкен жауапкершілік пен кәсібилікті талап ететін абыройлы міндет. Сіздердің адал еңбектеріңізге шынайы ризашылығымды білдіремін, – деді Ербол Қарашөкеев.
Облыс әкімі биыл Жамбыл журналистикасы үшін мерейлі жыл екеніне назар аударды. Өңір тарихымен біте қайнасқан «Мойынқұм таңы» және «Шұғыла-радуга» басылымдарының жарық көргеніне 60 жыл толса, «Жамбыл-Тараз» газеті өзінің 30 жылдық мерейтойын атап өтуде. Сонымен қатар Қордай ауданы тұрғындары үшін маңызды ақпараттық алаңға айналатын «Қордай24» телеарнасы өз жұмысын бастады. Бұл – өңірдің ақпарат кеңістігінің кеңейіп, журналистика саласының жаңа деңгейге көтеріліп келе жатқанын аңғартатын маңызды қадам.
Мерекелік шара барысында аймақтың ақпараттық кеңістігін дамытуға және кәсіби журналистиканың өркендеуіне елеулі үлес қосқан бірқатар БАҚ қызметкері мемлекеттік және ведомстволық наградалармен марапатталды.
Қазақстан Республикасы Президентінің Жарлығына сәйкес «Қазақстан» РТРК» АҚ Жамбыл облыстық филиалының журналист-редакторы Бақытжан Әлімқұлов Құрмет орденімен наградталды.
Сондай-ақ ақпарат саласының ардагерлері мен үздік мамандарына Қазақстан Республикасы Мәдениет және ақпарат министрлігі, Жамбыл облысы әкімінің және Қазақстан Жазушылар одағы атынан арнайы марапаттар табысталды. Олардың қатарында «Еңбек ардагері», «Ақпарат саласының үздігі» төсбелгілері, «Облысқа сіңірген еңбегі үшін» белгісі, Құрмет грамоталары мен Алғыс хаттар бар.
Жылы әрі тағылымды кездесуде журналистика саласының ардагерлері – Елен Әлімжан, Бекет Момынқұл, Асқарбек Сейілхан, Көсемәлі Сәттібайұлы және Ғалым Қасабай сөз алып, өңір журналистикасының бүгіні мен болашағына тоқталды. Олар жас буын журналистердің ізденісі мен кәсіби қарымын жоғары бағалап, уақыт талабына сай жаңашылдықтарды меңгеруге деген ұмтылыстары қуантатынын айтты.
Мерекелік жиын облыс өнерпаздарының концерттік бағдарламасымен қорытындыланып, БАҚ өкілдеріне көтеріңкі көңіл күй мен ерекше әсер сыйлады.
