Қазіргі қоғамда ерекше білімді қажет ететін балаларды қолдау, оларды өмірге бейімдеу – маңызды әлеуметтік міндеттердің бірі. Осы бағытта оңалту және бейімдеу орталықтарының атқарып отырған жұмысы орасан зор. Қаратау қаласындағы осындай орталықта балалар тек ем алып қана қоймай, жан-жақты дамуға мүмкіндік алуда.
Мұнда жүргізілетін жұмыстардың басты бағыты – баланың психологиялық және әлеуметтік бейімделуін қамтамасыз ету. Мамандар әр баланың ерекшелігін ескере отырып, жеке бағдарламалар құрып, жүйелі түрде жұмыс жүргізеді. Бұл балалардың өзіне деген сенімін арттырып, қоршаған ортамен еркін қарым — қатынас жасауына жол ашады.
Жуырда аталмыш орталықтың психолог маманы Нұржамал Конарбекова тәрбиеленуші балалармен «Ғажайып көбелектер» тақырыбында психологиялық ашық сабақ өткізді. Психологиялық жаттығулар ерекше балалармен жұмыстың негізгі бөлігі саналады. Сабақ барысында маман түрлі психологиялық жаттығулар мен ойын элементтерін пайдаланып, балаларды белсенді қатысуға шақырды. «Ғажайыптар әлеміне» саяхат жасап, көктем құбылыстары мен көбелек бейнесі арқылы балаларға өзгеріс, даму және әсемдік ұғымдары түсіндірілді. Қатысушы бала өзін көбелекпен салыстырып, өз армандары мен ішкі сезімдерін қағаз бетіне түсірді. Бұл жұмыс баланың ұсақ моторикасын дамытып қана қоймай, қиялын ұштап, көңіл-күйін көтеруге, ішкі сезімдерін сыртқа шығаруға септігін тигізді.
Мамандардың айтуынша, ерекше балаларға ең алдымен қолдау мен түсіністік қажет. Сондықтан орталықтағы әрбір сабақ мейірім мен қамқорлыққа негізделіп, балалардың қабілетін ашуға бағытталады. Ата-аналармен тығыз байланыс орнату да – жұмыстың маңызды бөлігі. Бұл бала дамуының оң нәтижесін арттыруға мүмкіндік береді.
Ерекше балаларға дұрыс бағыт-бағдар беріп, олардың өмірге бейімделуіне жағдай жасау – ортақ міндет. «Ғажайып көбелектер» атты психологиялық шара осындай ерекше балаларға қамқорлық пен қолдаудың айқын көрінісі. Осындай жүйелі жұмыстардың нәтижесінде балалардың болашаққа деген сенімі артып, өз мүмкіндіктерін толық жүзеге асыруға жол ашылады.
Талас ауданы
