Тараз қаласындағы Мәдениет үйінде халықаралық деңгейде өткен «Taraz City Fest» көпжанрлы өнер фестивалі жоғары деңгейде ұйымдастырылды. Бұл өнер додасында «Анаға тағзым» Жамбыл облыстық отбасылық даму әлеуметтік орталығының «Ерке сылқым» хореографиялық тобының өнерлі қыздары ерекше көзге түсті.
Биші қыздар сахна төрінде «Татар» және «Құстар» билерін орындап, көрермендердің ыстық ықыласына бөленді. «Құстар» биімен — І орын, ал «Татар» биімен — Гран-при иегері атанып, «Анаға тағзым» орталығының мақтанышына айналды.
Көптеген үміткерлер арасынан суырылып алға шыққан «Ерке сылқым» тобының жетістігі — еңбектің, бірліктің және шығармашылық шеберліктің нәтижесі. Топ жетекшісі Шолпан Байжанова шәкірттерін үлкен жауапкершілікпен дайындап, еңбегі еленіп алғыс хатпен марапатталды.
Бұл байқау жас таланттардың шеберлігін шыңдап, би өнерін одан әрі дамытуға зор мүмкіндік берді.
