Елбасының «Рухани жаңғыру» бағдарламасы аясында Жамбыл облысы әкімдігі Ішкі саясат басқармасының ұйымдастыруымен ақиық ақын Мұқағали Мақатаевтың туған күніне орай «Есіңе мені алғайсың…» атты әдеби сазды кеш өтеді. Мерекелік шара 8-ші ақпан күні сағат 17.00-де Ықылас Дүкенұлы атындағы Тараз қалалық мәдениет сарайында шымылдығын түрмек.
Тау тұлғаны еске алу кешіне Жұлдыз Мұқағалиұлы мен келіні Бақытгүл Айдарова арнайы шақырылуда.
Сондай-ақ қонақтардың қатарында Қазақстан Жазушылар одағы Басқарма төрағасының орынбасары, Халықаралық «Алаш» әдеби сыйлығының иегері Бақыт Беделхан және Алматы, Қызылорда, Түркістан облыстары мен Шымкент қаласының ақындары мен зиялы қауым өкілдері болмақ.
Кешті «Shalqar» радиосының директоры, «Дарын» мемлекеттік жастар сыйлығының лауреаты Қалқаман Сарин жүргізеді.
Сондай-ақ, ақынның туған күні қарсаңында бас қосқан оңтүстік аймақтық ақындардың арасында «Ақынға парыз көп ойлау, Артық та емес доп ойнау» атты кіші футболдан жолдастық кездесу өтеді. Теңбіл доп шеберлері 8-ші ақпан күні сағат 11.00-де Тараз мемлекеттік педагогикалық университетінің спорт алаңында күш сынасады.
