Елімізде 2021 жылдың сәуірінен бастап жұмыс істеп жатқан «Girls Power» қоры жайлы естіп пе едіңіз? Атауына қарап-ақ, нәзік жандылардың қоғамдағы рөлін айқындап, жан-жақты дамуына қолдау көрсететінін түсінуге болады. Білсек, қордың да түпкі мақсаты – қыздарды еңбектің барлық саласында ер адамдармен тең дәрежеде қызмет етіп, түрлі бағытта қабілеттілігін арттыруға көмектеседі екен. Ашылғанына 1 жыл толмаса да сан алуан тегін курстар мен іс-шаралар ұйымдастырып үлгеріпті.
Негізі, аталмыш қор «STEM» саласын аудандар мен аймақтарда тұратын қыздар арасында танымал етуді көздейді. «STEM» – Sіence, Technology, Engineering және Mathematics пәндеріне көп көңіл бөлетін оқу бағдарламасы. Қор қызметкерлері тек «STEM» саласымен шектелмей, қыз балаларды барлық салаларда кәсіби шеберлікке, жеке қабілетін арттыруға күш салатындарын айтады.
– Өткен жылы «Girls in STEM» тренингін және 10 кездесу, 6 курс (UX/UI», «Дизайн-мышление», «Arduino», «Решение бизнес-задач», «Алға!» дағдылар мектебі және «Ағылшын тілі грамматикасы» курстары) өткіздік. Сонымен қатар тегін репетиторға конкурс, Таразда дизайндық ойлау хакатоны іспетті іс-шараларды ұйымдастырдық. Тараз қаласында өткен хакатон біздің ең алғаш рет белгілі бір орында өткізген, яғни офлайн іс-шарамыз болды. Себебі көбіне іс-шараларымызды онлайн өткіземіз.
2021 жылдың қазан айында хакатонда «National Alumni Network»-тың қолдауымен «Дизайн-мышление» курсымыздан өткен оқушылар өз жобаларын таныстырды. Жалпы, 52 оқушы білім алды және олардың 38-і Тараздан қатысты. 6 команданың арасынан 3 команда жүлделі орындарға ие болды. Жүлдегерлерге 200 000, 150 000 және 100 000 теңге көлемінде қаржылай сыйақы берілді. Қазір оқушылар өз жобаларын біздің жетекшілігімізбен дамытуда. 1-орын иегері атанған Аяна Сағымбек командасының жобасы Тараз қаласында туризмді дамытуға бағытталған. Жеңімпаздар «Орёл и Решка» бағдарламасы секілді Тараз қаласындағы саяхатты видеоға түсіріп, «Instagram» әлеуметтік желісі мен «YouTube» хостингіне жариялаған. Мысалы, басында олар тиын лақтырады. Егер «орёл» түссе олар көне Таразға, «решка» түссе жаңа Таразға аттанады. 2-орын иегерлері – Аружан Нұрманованың командасы. Олар менторлық жоба жасауды мақсат етті. Назарбаев зияткерлік мектебінде немесе «Білім-Инновация» лицейінде оқитын қыздар басқа мектептердегі қыздарға көмектеседі. Мысалы, Аружанның тобы осы командалардың арасында хакатон ұйымдастырып, сыйлық ретінде кітап, бағдарламалауды үйренуге арналған сайттарға тегін жазылу немесе басқа да заттарды беруді ойлаған. Соңында кішігірім видео түсіріп, «Әрбір қыз осындай жетістіктерге жете алады» дегенді жеткізгілері келеді. 3-орынды Іңкәр Ибрагимнің командасы олжалады. Олар мектеп оқушыларының арасында компьютерлік технологияларды дамытатын клуб ашуды көздейтін жобаны жасады. Клуб оқушыларға керекті орта және курстар мен материалдарды табуға көмектесіп отырады. Сонымен қатар клуб оқушыларға IT саласындағы мамандықтар туралы шешім қабылдауға атсалысады.
Енді біздің шараларымызға қатысушыларды қабылдау үшін курсқа өтініш формасын ашамыз. Содан кейін тіркелу басталады. Курсқа қатысуға ниеттілер эссе түрінде сұрақтарға жауап жазады. Қысқаша айтқанда, өтініш тастағандар конкурстық іріктеуден өтеді. Қатысушылардың жас шамасы әр кезде әртүрлі болады. Бірақ көбінесе біз 8-10-сынып оқушылары мен 1-3-курс студенттерін аламыз. Себебі көп жағдайда 11-сыныптар университетке, емтихандарға дайындалады, ал 4-курстар жұмыс іздеумен, ғылыми жұмыстармен айналысып, қолдары босай бермейді, – дейді «Girls Power» қорының қазақ тіліндегі әлеуметтік медиа менеджері Сағадат Төлембай.
Тараздағы хакатонды қор командасының 7 қызметкері жүргізуде. Осы орайда «Қорды қаржыландыру көзі қайдан?» деген сұрақтың туатыны заңды. Бұған Сағадат Төлембай:
– Қорымыздың көпшілікке, әсіресе жас ұрпаққа пайдалы мақсаттарын көрсетіп, әлеуметтік жобаларға арналған мемлекеттік гранттарды иеленуге еңбектенеміз. Грант менеджеріміз Мадина Мулюкова мен қорымыздың негізін қалаушы Динара Әуелбекова гранттарды іздеумен айналысады және оларға өтініш тастайды. Осы уақытқа дейін біз USAID, Еуразия Қоры, NAN Alumni, NU Alumni және БҰҰ ДБ-ның қолдауымен курстар мен хакатон өткіздік.
«Қордың көпшілікке пайдасы неде?» дегенге тоқталсам, бәріміз байқағандай, әйел адамдар техникалық салада көп емес. Себебі олардың саналарында «кемсітушіліктерге ұшырауым мүмкін» немесе «менің қолымнан келмейді, себебі ұлдар мықты ғой» дегендей шекаралар болады. Бұл, өкінішке қарай, көп жағдайда кездеседі. Өз басымнан да осындай қиыншылықтарды өткердім. Физика пәнінен олимпиадаларға қатысқанда ұл балалар мен мұғалімдер күшіме сенбейтін. Осындай жайттар күнделікті өмірде қоғам арасында көптеп орын алады. Осының әсерінен қыздардың бойындағы сенімділік азая бастайды. «Girls Power» қоры мұндай жағдайларға мүмкіндік бермейді. Біз қыздардың қолынан бәрі келетінін көрсеткіміз келеді. Сондықтан оларды қолдауға барынша атсалысамыз, – дейді.
Әдетте бірқатар мекемелер қыз балалардың тұрмысқа шығып, құрсақ көтеріп, бала күтіміне байланысты демалысқа шығатындығынан да жұмысқа қабылдаудан бас тартып жатады. Осындай кемсітулерге жол бермеу үшін де аталмыш қор қыз балалардың кәсіби шеберлігін арттырып, қоғамдық белсенділігін, өмірге бейім қабілетін дамытуға күш салатын көрінеді. Көптің игілігі үшін атқарып жатқан қор жұмысына біз де сәттілік тіледік.
Қамар ҚАРАСАЕВА
https://arainfo.kz/girls-power-%D2%9Aori-turali-est%D0%86d%D0%86%D2%A2%D0%86z-be
