Депутаттық мандат – мыңдаған халықтың аманаты. Қай деңгейде болсын мандат иесі болудың жүгі жеңіл емес. Міне, осы міндетті аудандық мәслихаттың депутаттары өте жақсы сезінеді. Біз оны халық қалаулыларының түрлі іс-шара, қоғамдық жұмыстардағы белсенділігінен байқап отырмыз.
Аудандық мәслихатттың төрағасы Нұртас Саурықов аудан орталығында өткен барлық іс-шараның ортасынан табылады. «Жақсының жақсылығын айт» дегендей, оны көзіміз көріп жүр. Ауданда сенбілік жұмыстары өтсе де мәслихаттың төрағасы сол жерде жүреді. Мұнан бөлек, облыс деңгейіндегі істерге де назар аударады. Нұртас Ұзақұлы көрші Шу, Қордай, Меркі аудандарында өткізілген ауқымды іс-шараларға барып, тәжірибе алмасып жүруді де өз міндетіне алған. Ол қыдырып, ас ішіп қайту емес, өзге ауданның ұйымдастыру жұмыстарын байқау. Сол жерден байқаған озық жұмыстарды түрлендіріп, өз ауданымыздың ауқымды іс-шараларына қолдануды үнемі айтып, ойын бөлісуден жалыққан емес. Белсенді халық қалаулысының бірі – «АМАNАТ» партиясы аудандық филиалының төрағасы Манарбек Көшкімбаев.
Манарбек Өсербекұлы округ әкімі, ішкі саясат, құрылыс бөлімдерінің басшысы, аудан әкімі аппаратының басшысы болып басқару ісінде ысылған азамат. Оның осы басшылық тәжірибесі саяси науқандарда айқын көрініс табуда. Ол халықпен кездесуінде құрғақ сөз, жалаң ұран емес, елдің дамуына қатысты сапалы талдау жасап, өзінің терең білімін көрсетуде. Оны үнемі аңғарып жүрміз.
Депутаттар Бекболат Өткелбаев, Қанат Көшербаев та үнемі өзекті мәселелерді көтеріп, халықтың сөзін сөйлеуге дайын тұрады. Халық қалаулылары Нұрлан Орынбаевты, Ғалия Шубаеваны, Бағлан Жүнісбековті, Бақыт Серібаевты ынталылар қатарына қосуға болады. Өзге депутаттар да белсенді. Сондықтан, мойынқұмдық сайлаушылар аудандық мәслихат депутаттарын таңдағанда дұрыс таңдау жасаған екен деген ойға келдік. Әрқашан халықтың мәселесін шешуде депутаттарымыз белсенді болғай!
Есет ЖАҢАБАЙҰЛЫ, Мойынқұм ауданы
