Көкшетауда көлік кісіні басып кеткен: рөлді әйеліне берген азамат неше жылға сотталуы мүмкін
Көкшетауда жаяу жүргіншіні көлікпен қағып, өліміне себеп болған әйел жүргізушінің жұбайы бес жылға дейін бас бостандығынан айырылуы мүмкін.
«Көлік құралын заңсыз басқаруға берген адамның үстінен қылмыстық кодекстің 349-бабы бойынша қосымша қылмыстық іс қозғалды. Ол – күдіктінің жұбайы. Қазір қажетті тергеу әрекеттері жүргізіліп жатыр. Аталған бап бес жылға дейін бас бостандығынан айыру жазасын қарастырады. Соңғы шешімді сот қабылдайды», – деп түсіндірді ішкі істер министрінің орынбасары Санжар Әділов мәжіліс кулуарында.
Сонымен қатар, қазақстандық әйелдің өзіне қатысты да Қылмыстық кодекстің 345-бабы бойынша қылмыстық іс қозғалды.
Көкшетауда тұрғын үй ауласында адам қағып кеткен әйелдің жүргізуші куәлігі болмай шыққаны бұған дейін белгілі болған. Ақмола облысының полиция департаменті 52 жастағы әйел өліміне байланысты екі қылмыстық іс қозғады. Айта кетейік, бірнеше күн бұрын Көкшетауда көлік тізгіндеген әйел көшеде кетіп бара жатқан әйелді басып кеткен еді. Салдарынан әлгі адам оқиға орнында көз жұмған.
