Еркінбек Солтыбаев,
облыстық ардагерлер кеңесінің төрағасы
Қазақстан халқы Ассамблеясы, яғни өңірімізде тұрып жатқан ұлт пен ұлыстардың тіршілік-танымына, әдет-ғұрпына, салт-санасы мен тарихына арналып жарық көріп жатқан этнограф, өлкетанушы, натуралист құсбегі Жапар Сатылғановтың бас болып қолға алған «Ұлы шаңырақ» газетінің болашағы баянды боларына бек сенімдімін. Ағаларының ой-тілегін жүзеге асырып, жастардың бойына жан үрлеп отырған өзге ұлт өкілдеріне арналған еліміздегі тұңғыш басылымның көптің көңілінен шығып, жоғары идеялы газет болары айқын.
Елбасы Нұрсұлтан Әбішұлы Назарбаевтың тікелей бастамасымен құрылған Қазақстан халқы Ассамблеясының ел тыныштығы мен бірлігін сақтауға қосып отырған үлесі зор. Мемлекет басшысының өзі нақтылап берген «Ел бірлігі» доктринасы – қазақ жерін мекен еткен әрбір ұлттың ынтымақ, бейбітшілік, отансүйгіштік жолында аталы іс тындыратын алтын діңгегі десек болады.
Бүгінде Әулиеата өңірінде 12 ұлт пен ұлыс өкілдері тату-тәтті, бір шаңырақ астында өмір кешуде. Олардың ішінде ел бірлігі үшін өлшеусіз үлес қосып жүрген облыстық ардагерлер кеңесінің өзге ұлт өкілдерінен құралған мүшелері де аз емес.
«Ұлы шаңырақ» – ол сан ұлтты құшағына сыйдырып отырған қазақ халқы. Ал сол шаңырақты биіктетіп, тіреуін мықтап тұрған уықтары – еліміздегі көп ұлттар. Осынау құндылығымызды қастерлеп, кейінгі ұрпаққа насихаттауда аталы істі қолға алып отырған «Ұлы шаңырақ» газетіне облыс ардагерлері барынша қолдау білдіреді. «Сырын білмегенге –
сый жасау қиын» дейді дана қазақ. Сондықтан басылым бетінде «Ұлттар құндылығы» атты айдар ашып, оған көненің көзі, өткеннің өзі болған қарияларымыздың ұлағатты сөздері мен ұрпаққа үлгі болар өнегелерін көрсетіп отырсақ, нұр үстіне нұр болар еді.
«Ұлы шаңырақ» газетінің өткен жылдың соңында жарық көрген алғашқы санын оқып отырып, басылымның мақсаты мен міндеті айқын, көздегені ұлттар достығы мен ел тыныштығы екеніне көз жеткіздім. Сондықтан жаңа басылымның әрбір қадамына сәттілік тілеп, жазары мен оқырманы көп болсын деймін!
