Ұлттық құрылтайдағы бастамалар ел өміріндегі жаңа дәуірдің басталғанын айқын аңғартты – Акбаржон Исмаилов
Қазақстан халқы Ассамблеясы Кеңесінің мүшесі, Тәжіктердің Республикалық этномәдени орталығының төрағасы Акбаржон Исмаилов Ұлттық құрылтайдың бесінші отырысында Президент көтерген бастамаларды ел дамуының жаңа тарихи кезеңі деп бағалады, деп хабарлайды turkystan.kz.
Оның айтуынша, құрылтайдағы шешімдер ұлттық бірлікті нығайтып, мемлекеттік басқаруға тың мазмұн енгізіп, Қазақстанның болашағына берік бағдар айқындайды.
«Қасым Жомарт Тоқаевтың V Ұлттық құрылтайда көтерген бастамалары ел өміріндегі жаңа дәуірдің басталғанын айқын аңғартты. Бұл жиын тек саяси алаң емес, мемлекеттің болашағына бағытталған терең ой мен тарихи жауапкершілік тоғысқан маңызды кезең болды. Президенттің сөзі Қазақстанның бүгінгі болмысына ғана емес, ертеңгі тағдырына бағдар берген мазмұнымен ерекшеленді.
Мемлекет басшысы Қазақстан халқы Ассамблеясы мен Ұлттық құрылтайдың өз уақытына тән тарихи миссияны толық атқарғанын атап өтті. Шын мәнінде, Ассамблея ел ішіндегі тұрақтылықты сақтап, татулық пен келісімді нығайтудың сенімді тірегіне айналды. Ол түрлі этностарды бір шаңырақтың астына топтастырып, біртұтас елдік сананы қалыптастыруға өлшеусіз үлес қосты. Бұл кезең еліміздің қалыптасу тарихында айрықша орын алатыны сөзсіз.
Ендігі уақытта сол тағылымды жол жаңа мазмұнмен жалғасқалы отыр. Халық кеңесін құру туралы бастама тәуелсіз Қазақстанның жаңарған тарихындағы маңызды белес ретінде бағаланады. Бұл кеңес қоғамдағы түрлі пікір мен көзқарасты бір арнаға тоғыстырып, ел тағдырына қатысты шешімдерде ақыл мен парасаттың үстем болуына жол ашпақ. Оның құрамында тәжірибесі мол, ойы кемел азаматтардың болуы халықтың ертеңге деген сенімін күшейтеді.
Парламентке Құрылтай атауын беру жөніндегі ұсыныс та терең мағынаға ие. Бұл ұғым халқымыздың тарихи жадында ел тағдыры талқыланған, бірлік пен жауапкершілік алдыңғы орынға шыққан қасиетті кеңес ретінде сақталған. Сол атауды жаңғырту арқылы мемлекет басқару жүйесіне ұлттық рух пен тарихи сана қайта оралады. Бұл қадам Қазақстанның жаңа кезеңін өз тамырынан ажыратпай, керісінше өткеннің өнегесін бүгінгі дамумен ұштастыруға мүмкіндік береді.
Мемлекеттің саяси тұрақтылығын нығайту жолында Вице-президент институтын енгізу жөніндегі ұсыныс та уақыт талабынан туған маңызды бастама. Бұл ел басқарудағы сабақтастықты сақтап, билік жүйесінің орнықтылығын қамтамасыз етуге бағытталған. Мұндай ойластырылған қадамдар мемлекеттің ертеңін берік етуге қызмет етеді.
Жалпы алғанда, көтерілген бастамалардың барлығы бүгінгі күннің емес, болашақ ұрпақтың қамын көздеген терең мемлекеттік пайымның көрінісі. Бұл Қазақстанның жаңа тарихи кезеңге аяқ басқанын білдіреді. Ел тағдырына қатысты шешімдер халықтың үмітімен ұштасып, жаңарған санамен жалғасып отыр. Сондықтан бұл бағытқа жұртшылықтың сеніммен қарап, бірлікпен қолдайтыны анық. Себебі жаңа кезең жаңа жауапкершілікті талап етеді, ал ол жауапкершілік ортақ тарихқа айналмақ», — деп жазды ол.
Толық нұсқасына гиперсілтеме беруді ұмытпаңыз: https://turkystan.kz/article/275028-ulttyq-quryltaidagy-bastamalar-el-omirindegi-zana-dauirdin-bastalganyn-aiqyn-angartty-akbarzon-ismailov
