Бүгінде ұлттық спортты дамыту – мемлекеттік ауқымдағы маңызды бағыт.
Ұлттық спортты соның ішінде ат спорты, көкпар, асық ату, ләңгі тебу, тоғызқұмалақты дамыту еліміздегі маңызды міндеттердің бірі болып табылады.
Бүгін Ұлттық спорт күніне орай, қаламыздағы Спорт кешенінде мектеп оқушылары арасында тоғызқұмалақ, ләңгі тебу, асық ату, арқан тарту спорт түрлерінен аудандық турнир өткізілді. Сайысқа қала мен ауылдық округтерден мектептің 9-11 сыныбынан құралған 20 команда қатысып, өзара бақ сынасты.Турнирдің ашылу салтанатына аудан әкімінің орынбасары Ерлан Ермағанбетов қатысып, құттықтау сөз сөйледі:- Жастарды ұлттық спортқа тәрбиелеу үшін өздерінің шеберліктері мен күштерін, өздерінің тәжірибелерін жұмсай береді деп сенемін. Бүгінгі сайысқа қатысып отырған жас спортшыларымызға сәттілік тілеймін, — деді. Мұнан соң «AMANAT» партиясы аудандық филиалының төрағасы Мұратбек Есмұрзаев ізгі тілегін жолдап, жастар арасында ұлттық спортты дамытудың маңыздылығына тоқталды.Сайыс қорытындысы бойынша жүлдегерлер мен жеңімпаздар ұйымдастырушылар тарапынан дипломдар мен медальдармен марапатталды.
