Бұл тәсілді «сақтандырылған» мәртебесі бар азаматтармен қатар, жүйеге алғаш рет төлем жасайтын және барлық дербес төлеушілер қолдана алады. Бұл туралы Әлеуметтік медициналық сақтандыру қорының Жамбыл облысы бойынша филиалының директоры Ғайни Аймағанбетова түсіндіріп берді, деп хабарлайды Jambylinfo.kz
Мәртебені тексеруден бастаңыз
Төлем жасамас бұрын азаматтар өз мәртебесін және соңғы 12 айдағы жарналардың бар-жоғын тексеруі тиіс.
Бұл қызметті Qoldau 24/7 мобильді қосымшасы, Telegram-дағы SaqtandyruBot, сондай-ақ eGov.kz электронды үкімет порталының жеке кабинеті арқылы орындауға болады.
Тексеру нәтижесінде әр ай бойынша төленген жарналардың үзінді көшірмесін көруге мүмкіндік бар. Егер бірнеше ай үшін төлем жүргізілмеген болса, сол айлар үшін төлем жасап, мәртебе алуға болады. Алайда мәртебені жоғалтпау үшін ай сайынғы жарналарды уақытылы төлеу қажет.
Алдағы 12 айға төлем жасау тиімді
Егер азамат бұрын ешқандай төлем жүргізбеген болса, онда өткен айлар үшін емес, алдағы 12 айға алдын ала төлем жасаған тиімді. Бұл өз кезегінде бір жыл бойы медициналық сақтандыру жүйесінде үздіксіз мәртебеде болуға мүмкіндік береді.
МӘМС жарналарын екінші деңгейдегі банктердің мобильді қосымшалары, жылдам төлем терминалдары және «Қазпошта» бөлімшелері арқылы төлеуге болады. Дербес төлеушілер үшін төлем тағайындау коды – 122.
Әр айға жеке төлем қажет
Жүйе төлемдерді дұрыс есептеу үшін жарналарды әр айға бөлек-бөлек қабылдайды. Сондықтан бір жылдық жарнаны бір төлеммен аударуға болмайды – әр ай мен жылды жеке көрсетіп төлеу керек. Егер ағымдағы айдың аяқталуына аз уақыт қалса немесе сол айда медициналық көмекке жүгінуді жоспарламасаңыз, төлемді келесі айдан бастап жасау ұсынылады. Осылайша азамат бір жыл бойы сақтандырылған мәртебесін сақтап отыра алады.
Қате төлемдерді қайтаруға болады
Төлемнен кейін үш жұмыс күні ішінде жарнаның жүйеге түскен-түспегенін тексеру қажет. Егер төлем ұзақ уақыт бойы жүйеде көрінбесе, деректердің дұрыстығын қайта тексеріп, банкке немесе «Азаматтарға арналған үкімет» мемлекеттік корпорациясына хабарласқан жөн. Қате төленген соманы қайтару үшін өтініш сол мемлекеттік корпорация арқылы қабылданады.
Мәртебені қалай тексеруге болады
МӘМС жүйесіндегі сақтандырылу мәртебесін төмендегі тәсілдермен білуге болады:
Әлеуметтік медициналық сақтандыру қорының сайты: msqory.kz
Telegram-бот: SaqtandyruBot
Qoldau 24/7 мобильді қосымшасы
eGov.kz порталы
Кейбір банктердің мобильді қосымшалары
МӘМС жүйесіне бір жылға алдын ала төлем жасау — азаматтардың медициналық қызметтерге үздіксіз қол жеткізуін қамтамасыз ететін ыңғайлы шешім. Ең бастысы — төлемдерді ай сайын дұрыс және уақтылы жүргізу. Бұл өз кезегінде әр азаматтың денсаулығын қорғауға және сапалы медициналық көмекке жол ашады.
«Әлеуметтік медициналық сақтандыру қоры» КЕАҚ Жамбыл облысы бойынша филиалы
