Маңғыстау телеарнасы
Ақтау тұрғыны Самиғолла Ғаниев церебралды сал ауруына шалдыққан қызы үшін екінші қабаттағы пәтерінен көшеге шығуына мүмкіндік беретін жеке лифт орнатып берді, деп хабарлайды turkystan.kz.
33 жастағы Гүлберген – бес баланың тұңғышы. Заманауи лифт бейнекамерамен, жарықтандыру жүйесімен және кодты құлыппен жабдықталған. Ол 250 келіге дейін жүк көтереді. Ал бірінші қабатқа дейінгі биіктігі – 3 метр 80 сантиметр.
Бұл шешімге Самиғолла Ғаниев әйелі мен қызының кезекті серуенінен кейін келген.
«Әйелім қызымызды екінші қабатқа көтеріп жатқанда, белі ауырып қалды. Сосын ол қандай да бір көтергіш ойлап табуды өтінді. Қазақстанның түкпір-түкпірінен іздей бастадым. Рудный қаласындағы компанияға тап болдым. Бастапқыда мұндай құрылғы жасамайтынын айтты. Кейін қайта хабарласып, тапсырыспен жасап бере алатынын жеткізді. Қазір қызым қуанышты, әйелім мәз. Бауыр етің балаң үшін ештенені аямайсың», – деді көпбалалы әке Маңғыстау телеарнасына берген сұхбатында.
Лифтті жасауға, тасымалдауға және орнатуға бір айға жетпейтін уақыт пен 4 миллион теңге жұмсалған. Алайда қамқор әке мұнымен тоқтамады. Гүлбергенге жайлы болуы үшін ол өз бөлмесіне балкон да жасап берді.
Көпшілік әкенің қызы үшін жасаған әрекетіне тәнті болып, жылы пікірлерін білдірді.
«Ең керемет әке», «Неткен кең жүректі әке?!», «Алла шипасын берсін», «Әке деген атқа лайық ер азаматсыз», «Кейде әкенің махаббаты сөзбен емес, осындай әрекетпен көрінеді», «Сіздей әкесі бар қызыңыз бақытты», «Мейірімді әкелер көп болсын», – деп жазды көпшілік.
Толық нұсқасына гиперсілтеме беруді ұмытпаңыз: https://turkystan.kz/article/287073-mumkindigi-sekteuli-qyzyna-zeke-lift-zasap-bergen-ake-kopti-suisintti-video
