«Нұр-Бала» шағын үйінде «Төрле, төрле Жаңа жыл» атты дәстүрлі жаңа жылдық мерекелік кеш кең көлемде ұйымдастырылды. Шараға аудан басшылығы, орталық тәрбиеленушілері, ұстаздар, ата-аналар сондай-ақ облыстан арнайы келген қонақтар қатысып, мерекелік көңіл-күйді бірге бөлісті.
Мерекелік кештің басты сәні – балалардың өнері болды. Тәрбиеленушілер сахна төрінде ән айтып, би билеп, тақпақтар мен қойылымдар ұсынып, өздерінің жыл бойы жинаған өнерін көпшілікке паш етті. Әр нөмір көрерменнің ыстық ықыласына бөленіп, ата-аналар үшін де ерекше әсерлі сәттерге толы болды. Аяз ата мен Ақшақардың келуі балалардың қуанышын арттырып, зал ішін нағыз ертегі әлеміне айналдырды.
Кеш барысында ескі жылмен қоштасып, жаңа Жылқы жылын қарсы алу рәсімі де сахналық көрініс арқылы көркем түрде көрсетілді.
Ұлттық нақыштағы билер мен заманауи хореографиялық қойылымдар мерекенің мазмұнын байытып, балалардың шығармашылық әлеуетін айқын көрсетті. Сонымен қатар ұстаздар мен ата-аналарға арналған әсерлі әндер шырқалып, «Нұр-Бала» шағын үйіндегі тәрбиелік жұмыстар мен балаларға көрсетіліп жатқан жан-жақты қамқорлық көпшілік назарына ұсынылды.
Мерекелік кешке арнайы қатысқан аудан әкімі Ермек Карентаев балаларды, ата-аналар мен ұжым мүшелерін Жаңа жыл мерекесімен құттықтап, ізгі тілегін жеткізді. Сондай-ақ облыстан келген қонақтар да жылы лебіздерін білдіріп, орталықтың жұмысына оң бағасын берді. Шара барысында балаларға арнайы сыйлықтар табысталып, мерекелік көңіл-күй одан әрі жалғасын тапты.
Шара соңында ата-аналар мен қонақтар балалардың өнеріне ризашылықтарын білдіріп, «Нұр-Бала» шағын үйінің ұжымына алғыстарын айтты. Осылайша жаңа жылдық кеш балалардың шат күлкісі мен көтеріңкі көңіл-күйге толы әсерлі сәттермен қорытындыланды.
Жолдыбай ДӘМЕТОВ,
Мойынқұм ауданы
