Қазақ отбасының нағыз ұйытқысы – келін. Дана халқымыз ертеден ене мен келін қатынасына аса жоғары көңіл бөліп, оған байыппен қараған. Ата-анасынан көрген тәрбиесі мен қайын жұртының ықыласы және алғысына бөленіп жүрген келіндер қазір де бар.
Өткен жұмада, «Келіні жақсының – керегесі алтын» атты келіндер байқауының аймақтық кезеңі Ақермен ауылының мәдениет үйінде – Кеңес ауылынан Төребекова Балжан, Ақермен ауылынан Сабыралы Айдана, Тәтті ауылынан Құмбекқызы Айдана, Аспара ауылынан Жандилдаева Динара, Ақ жол ауылынан Шолпанбаева Арайлымның қатысуымен болып өтті. Келіндер байқауына қатысушылар: «Тегін білу – тектілік» (таныстыру); «Өнер сайысы»; «Ұлттық салт-дәстүрді көрсету» (көрініспен); «Сыр сандық» (салт-дәстүрге байланысты сұрақ-жауап); «Дәм-думан» (ұлттық тағамдар әзірлеу) кезеңдері бойынша өз өнерлерін көрсетті.
Мәдениет үйіне жиналған көрермен мен қолдаушылар қарасы мол болды. Іс-шара сайыс түрінде өтетін болғандықтан, көрермендер тарапынан «кім жеңер екен» деген белсенді ұмтылыс-ынта көрініп тұрды. Ә дегеннен, кеңестік келін өзін таныстыруда сөздерін қағазға қарап айтса, аспаралық келініміз де сөзін жатқа айта алмады, өзінің отағасы мен ұл-қыздарын сахнаға шығарып қоса таныстырды. Ақжолдықтар өздерінің таныстыруын әжесінен бата алу арқылы бастап, әнімен қоса әсерлі айтты. Ақермендік Айдана мен тәттілік Айданамыздың сәлемдесулері мағыналы болды және сондай бір жанға жайлы әсер қалдырды. Өнер сайысы бөлімінде ән де, би де болды және аспаралық Динара келіннің қолөнері паш етілді. Ол тоқыма, құрақ, матадан жасалған гүлдер, ыдыс-аяқ қойғыш, матадан гүлорам, не керек, барлық қолөнерімен тәнті етті.
Келіндер, негізінен, құлақ тесу, қонақ кәде, ат тергеу, абысын асы, бесік күзету, құрсақ шашу сияқты дәстүрлерімізді көрсетті. Бұл кезеңде ақермендік келін мен тәттілік келіннің ұсынған көріністері ұтымды шықты. Ақжол ауылының келіні ұсынған құрсақ шашу ырымы сахналық талаптарға сай болды, қалжыңы да аралас, жөн- жоралғылары да бар екен. Келіндердің көпшілігі «Сыр-сандық» бөлімінің сұрақ-жауаптарынан мүдірді. Тіпті, өздері көрсетіп отырған көрініс сұрақтарының өзіне мән бермегені байқалды. Бұл сайыста ақермендік, тәттілік және ақжолдық келіндер біршама сұрақтарға жауап берді.Сұрақтардың жобасы: ерулік, құрсақ той, жарыс қазан, жеті санына байланысты түсініктер, ырым сөздер мен тыйым сөздер төңірегінде қойылды.
«Дәм-думан» кезеңінде де Ақермен, Тәтті, Ақжол ауылдарынан келген келіндердің ас мәзірлері жоғары бағасын алды. Сайыс мақсаты жеңу болса, ақермендік Сабыралы Айдана, тәттілік Құмбекқызы Айдана және ақжолдық Шолпанбаева Арайлым жеңіске жетті.
Сейдалы Аманжолов ,
Меркі аудандық Мәдениет үйі
әдістемелік бөлімінің меңгерушісі
