Облыстық дарынды балаларға арналған мамандандырылған Дарын лицей-интернатында Аягүл Миразова атындағы математика кабинеті ашылды
Дарын мектеп-интернатында маңызды әрі мәні зор оқиға өтті – білім ордасында көрнекті ұстаз, білікті педагог, Қазақстан Педагогикалық Ғылымдар Академиясының Академигі, Қазақстанның тұңғыш Еңбек Ері, «Алтын жұлдыз» және «Отан орденінің» иегері, Қазақстанның еңбек сіңірген қайраткері, Қазақстан Республикасының Білім Беру ісінің Құрметті қызыметкері Миразова Аягүл Төреқызы атындағы математика кабинеті ашылды Аягүл Төреқызы Миразованың аты берілген математика кабинеті салтанатты түрде ашылды. Бұл игі бастама – жас ұрпақты ғылымға баулып, сапалы білім беру ісін дамытуға бағытталған жүйелі жұмыстың жарқын көрінісі.
Ашылу рәсіміне Жамбыл облысы әкімдігі білім басқармасының басшысы Оршубеков Нұрбек Әбубекұлы арнайы қатысып, жаңа кабинеттің маңыздылығына тоқталды. Өз сөзінде ол мұндай тағылымды істер оқушыларға үлкен мотивация беріп, олардың білімге деген қызығушылығын арттыратынын атап өтті. Сонымен қатар, білім саласындағы мұндай игі бастамалар өңірдегі білім сапасын арттыруға оң әсер ететінін жеткізді.
Салтанатты шара барысында Аягүл Төреқызы Миразова да сөз сөйлеп, өзінің жүрекжарды лебізін білдірді. Ол ұстаздық жолдың жауапкершілігі мен маңыздылығына тоқталып, жас ұрпаққа сапалы білім беру – әр педагогтың басты міндеті екенін атап өтті. Өз есімі берілген кабинеттің ашылуы өзіне үлкен сенім мен жауапкершілік жүктейтінін айтып, оқушыларға ғылым жолында табандылық пен ізденіс тіледі.
Іс-шара аясында Аягүл Төреқызы білім беру саласында үздік нәтижелерге қол жеткізген педагогтермен еркін форматта тілдесіп, тәжірибе алмасты. Кездесу барысында заманауи оқыту әдістері, оқушылардың логикалық ойлау қабілетін дамыту, математика пәнін оқытудың тиімді жолдары кеңінен талқыланды. Мұндай мазмұнды пікір алмасу ұстаздар қауымы үшін кәсіби дамуға серпін беретін маңызды алаңға айналды.
Сонымен қатар, шара барысында мектеп оқушылары өз өнерлерін көрсетіп, қонақтарға ерекше көңіл-күй сыйлады.
Аталған кабинет – тек білім алатын орын ғана емес, сонымен қатар ұлағатты ұстаздың есімін ұлықтап, оның еңбегін жас ұрпаққа үлгі ететін рухани кеңістікке айналмақ. Бұл бастама оқушылардың математика ғылымына деген қызығушылығын арттырып, болашақта бәсекеге қабілетті, білімді ұрпақ қалыптастыруға өз үлесін қосары сөзсіз.
