Павлодардағы балабақшалардың бірінде тәрбиеші жалаңаш баланы 40 минут салқын бөлмеге қамап қойған. Оны кішкентай қыздың ата-анасы балабақшада орнатылған бейнекамералардағы жазбадан көрген, деп хабарлады Шаңырақ инфо orda.kz–ке сілтеме жасап.
Ата-аналар шағымдарын Instagram-ға жариялады. Видеодан балабақша қызметкерінің жалаңаш баланы ойын бөлмесіне апарып, есікті жауып, өзі тамақ ішуге отырғанын көруге болады.
«3 ақпанда менің қызым 1 жас 10 айлық кезінде салқын бөлмеде 42 минут бойы жалаңаш, іш киімсіз қамауда отырған. Қызметкерлер баланы қамап қойып, тамақ ішуге кетті. Балабақша иесі тәрбиеші мен күтушінің мінез-құлқын түсіндіре алмады», – дейді баланың анасы.
Сондай-ақ ол жақында балабақшада балалардың уланғанын, содан кейін ата-аналар бақылау камераларынан бейнежазба сұрағанын айтты. Ал жекеменшік балабақша директоры Елена Данковская сот процесі жүріп жатқанын жеткізді.
«Видеода барлығы айтылған, шара қолданылды. Тәрбиеші мен күтуші шағымнан кейін бірден жұмыстан шығарылды», – деді Елена Данковская.
Павлодар қаласының білім бөлімі де оқиғаның мән-жайын анықтап жатыр екен.
«Арыз 7 ақпан күні кешке түскен. Балабақша жекеменшік. Дәл осындай арыз қалалық прокуратурада да бар. Құрылтайшыға хабарланды. Бұл факті бойынша іс жүргізілуде. Жағдайды зерделеу мақсатында мекеме қызметкерлері балабақшаға барады», – деп түсіндірді Павлодар қаласының білім бөлімі.
