Аудан әкімі Нұрбол Жүнісбеков Қаратау қаласының тұрғындарымен кездесіп, аудан көлемінде атқарылып жатқан істер барысымен таныстырды. Ерекше форматта ұйымдастырылған жиын Қаратау қаласындағы Орталық саябақта өтті. Ашық аспан астындағы кездесуге аудан әкімдігінің бөлім басшылары мен бірқатар мекеме басшылары, ардагерлер және қала тұрғындары қатысты.
Жиында алғаш сөз алған Қаратау қаласының әкімі Дархан Байымбетов 2026 жылы қала көшелерін жөндеу, қала ішіндегі автомобиль жолдарынының сапасын жақсарту, көшелерді жарықтандыру және инфрақұрылымды дамыту бағытындағы жұмыстар жалғасын тауып, бірқатар жобалар жүзеге асқанын атап өтті. Дархан Тобашұлы өз сөзінде Қаратау қаласындағы негізгі көшелерге орташа және күрделі жөндеу жұмыстары жүргізіліп, жаяу жүргіншілер жолы жаңартылып, саябақтар мен қоғамдық орындардың жарықтандыру жүйелері ретке келтірілгендігін, сонымен қатар, инженерлік желілерді жаңғырту, аулаларды абаттандыру жұмыстары кезең-кезеңімен жалғасып жатқандығын жеткізді.
Кездесу барысында аудан басшысы Нұрбол Жүнісбеков ауданның әлеуметтік -экономикалық даму бағытындағы негізгі салалар бойынша жүзеге асырылып жатқан істер барысын баяндап, ірі инвестициялық жобаларды атады. Ағымдағы жыл ішінде жалғасын тапқан жұмыстарға тоқталып, алдағы жоспарлармен бөлісті. Нұрбол Әбдімәжитұлы өз сөзінде Үшарал ауылы маңында су үнемдеу технологияларын енгізіп, тамшылатып суарумен айналысатын швейцариялық «Harvest Group SA» холдингіне кіретін «Харвест Агро Холдинг» ірі агроөнеркәсіп нысаны салынатындығын атап өтті.
Кездесуге жиналған тұрғындар қаланың тазалығы мен қоқыс мәселесін алға тартты.
Қаратау қаласындағы демалыс орындары мен халық көптеп жүретін қоғамдық орындардағы әжетхана мәселесі де сөз болды. Тұрғындар тарапынан көтерілген аталмыш мәселе бойынша Қаратау қаласының әкімі Дархан Байымбетов қала тазалығы ең алдымен тұрғындардың мәдениеттілігіне байланысты екендігін алға тартты. Тұрғындар тұрмыстық қалдықтарды көп жағдайда арнайы қоқыс жәшіктеріне емес, сол маңайға тастайтындығын, қазіргі таңда қала көшелеріне қосымша бейне бақылау камералары орнатылып жатқандығын айтып, алдағы уақытта осы бейнебақылау камералары арқылы айыппұл салу жұмыстары жүргізілетіндігін ескертті. Ал, аудан әкімі Нұрбол Жүнісбеков қала ішінде қайта жаңартылған саябақтар мен ойын алаңдарындағы орындықтардың, әткеншектердің бұзылып жатқандығын айтып, ендігі жерде мұндай келеңсіздіктерге жол бергендер бейнебақылау камералары арқылы анықталып, жауапкершілікке тартылатындығын жеткізді. Тұрғындарды қоғамдық мүлікті күтіп ұстауға, қаланың санитарлық тазалығына немқұрайлы қарамауға шақырды. Нұрбол Әбдімәжитұлы сондай-ақ, алдағы уақытта қала тазалығын сақтау мақсатында қосымша шаралар қабылданып, коммуналдық қызметтердің жұмысы күшейтілетіндігін жеткізді.
Кездесу барысында сөз алған аудандық ардагерлер кеңесінің төрағасы Жұмабек Әсемов, қалалық ардагерлер кеңесінің төрағасы Арыстан Байходжаев, Талас ауданының Құрметті азаматы Базылхан Тоқтыбаев бүгінгі күнге дейін аудан көлемінде де, Қаратау қаласы бойынша да барлық салада көптеген іс жүзеге асқандығын тілге тиек етіп, халық игілігіне беріліп жатқан демалыс орындарының, көпшілік алаңдардың, көшелердің тазалығына тұрғындарда жауапты екендігін баса айтты. Еркін форматта өткізіліп жүрген мұндай кездесулер халық пен билік арасындағы байланысты нығайтуға сеп болатындығын жеткізді.
Талас ауданы
