Қазақстан туралы арандатушылық пікір білдірген блогерге 5 жылға елге кіруге тыйым салынды
Шетелдік Fasoollka лақап атымен танымал блогер Twitch платформасындағы тікелей эфирлерінде Қазақстан туралы арандатушылық мәлімдемелер жасағаны үшін Астанада әкімшілік жауапкершілікке тартылды. Бұл туралы Астана қалалық Полиция департаменті мәлім етті. Тәртіп сақшылары әлеуметтік желілерге жүргізілген мониторинг барысында бойжеткеннің Қазақстанның аумақтық тұтастығы мен жекелеген қалалардың мемлекеттік тиесілілігіне күмән келтірген эфирлерін анықтаған. Сонымен қатар стример тікелей таратылым кезінде халықтың мәдениетін мазақ етіп, азаматтардың абыройына нұқсан келтіретін агрессивті сөздер айтқан. Жинақталған материалдар сотқа жолданып, сот шешімімен айыптыға әкімшілік айыппұл салынды.
Сот шешімінен кейін блогерді Қазақстан аумағынан шығару бойынша тиісті шаралар қабылданды. Сонымен бірге қолданыстағы заңнамаға сәйкес оның елге қайта кіруіне бес жыл мерзімге шектеу қойылды.
Астана қалалық Полиция департаменті шетелдіктердің елге еркін келе алатынын, бірақ мемлекет аймағында жүргенде заң талаптарын қатаң сақтауы тиіс екенін ескертті.
«Қазақстан шетелдік азаматтар мен ел қонақтары үшін ашық мемлекет. Сонымен бірге Қазақстан Республикасының аймағында болу заңнама талаптарын бұлжытпай сақтауды, сондай-ақ елімізге, оның азаматтарына және жалпыға бірдей мінез-құлық нормаларына құрметпен қарауды талап етеді», – деп атап өтті ведомстводан.
видеодан кадр
