Қазақстан азаматтары 2028 жылдан бастап Оңтүстік Кореяда заңды түрде жұмыс істей алады. Еліміз Оңтүстік Кореяның Еңбекке орналастыруға рұқсат беру (EPS) жүйесіне қатысушы мемлекеттер тізіміне ресми түрде енді, деп хабарлады Qaz365.kz Еңбек және халықты әлеуметтік қорғау министрлігіне сілтеме жасап.
Қазақстан E-9 жүйесіне енген 18-ші мемлекет атанды.
«Қазақстандық жұмысшыларды Корея Республикасына тарту 2028 жылдан басталады деп күтілуде. Оған дейін ұйымдастыру шараларының кешенін аяқтау, соның ішінде өзара түсіністік туралы үкіметаралық меморандумға қол қою және Қазақстанда корей тілінен тест тапсыратын EPS-TOPIK орталығын құру жоспарланған», – деді ведомство өкілдері.
Министрлік жұмысшыларды іріктеу бейресми делдалдарсыз, ресми жүйе арқылы жүзеге асатынын баса айтты.
Үміткерлер корей тілінен тест тапсырып, кәсіби дағдылары бойынша бағалаудан және медициналық тексерістен өтуі тиіс. Ведомство азаматтарды жүйе іске қосылғанға дейін «кепілді жұмысқа орналастыру» немесе іріктеуден жылдам өткізуді уәде ететін делдалдарға ақша бермеуге шақырды. Кандидаттарға қойылатын талаптар мен тіркеу мерзімдері туралы ақпарат кейінірек ресми ақпарат құралдарында жарияланады.
Еске салсақ, Қазақстанды EPS жүйесіне енгізу бағытындағы жұмыстар бірнеше жылдан бері жүргізіліп келеді. 2025 жылдың қаңтар айында кореялық делегация еліміздің дайындық деңгейін, инфрақұрылымы мен медициналық тексеру сапасын оң бағалаған болатын. Қазіргі уақытта бұл бағдарламаға 17 мемлекет, соның ішінде Өзбекстан, Қырғызстан және Тәжікстан да қатысады.
фото; Еңбек және халықты әлеуметтік қорғау министрлігі
