Қоғамдық қабылдау өткізіп, азаматтарды толғандырған сұрақтарға жауап бердім.
Атап айтқанда, Түркістан облысы тұрғындарының су ресурстарын заңсыз пайдалану және өңірдегі су шаруашылығы нысандарының аумағында заңсыз құрылыс жүргізу мәселелеріне қатысты өтініштері қаралды. Қабылдау қорытындысы бойынша «Қазсушар» РМК-ның жергілікті филиалы мен Арал-Сырдария бассейндік су инспекциясына нақты тапсырмалар берілді.\
Еске сала кетейін, Мемлекет басшысының тапсырмасын орындау мақсатында министрлік Бас прокуратурамен бірлесіп судың «қара нарығын» жою жөніндегі Жол картасын қабылдады. Құжатта су ресурстарына аудит жүргізу, заңсыз су алудың тәуекел аймақтарының картасын әзірлеу, су шаруашылығы инфрақұрылымын дамытуға бөлінген қаржы қаражатына тексеру жүргізу, су үнемдеу технологияларын енгізу және сыбайлас жемқорлыққа қарсы іс-шараларды жүзеге асыру сияқты шаралар көзделген.
Сонымен қатар қазақстандықтар өңірлердегі су саласындағы заңсыз әрекеттер туралы бізге жасырын түрде хабарлай алады. Осы мақсатта Telegram мессенджерінде «Судың қара нарығына жол жоқ!» чат-боты іске қосылды. Бұл бастама суару маусымында судың әділ бөлінуін қамтамасыз етуге, сондай-ақ «Қазсушар» РМК мен оның филиалдарының қызметіндегі сыбайлас жемқорлық және өзге де құқық бұзушылықтарды анықтауға және олардың алдын алуға бағытталған.