Жаңатас қаласында орналасқан «Стиль» тігін цехында медициналық маскадан бастап, өндіріске қажетті барлық киім түрлері және үй жиһазының жабдықтары тапсырыспен тігіледі. Цехта 15 адам тұрақты түрде жұмыс істейді.
Жеке кәсіпкер Ирина Николаевнаның айтуынша, цех 10 жылдан бері жергілікті нарықта бәсекеге қабілеттілігін танытуда. Қазіргі таңда «Слава» маркасымен танылған өнім түрін тұтынушылардың қатары артқан. Әсіресе, жергілікті «ЕвроХим» және «Қазфофат» сынды ірі кәсіпорындардан түсетін сұраныс жоғары. Тіпті, жергілікті тұрғындар да қалауындағы киім үлгісін тіктіруге тапсырыс беруде.
Ал «Жарас» зауыты мұнай өнімдерін сақтап қана қоймай, өңдеумен де айналысады. Оның ішінде дизель отынының 4 түрі, мазут және мұнай ертіндісі бар. Зауыт кәсіпкердің жеке қаражаты есебінен салынып, 2011 жылдың қазан айында іске қосылған.
Зауыттың атқарушы директоры Ернар Ерланұлының айтуынша, зауытта вахталы жұмыс режимімен тұрақты түрде 70 адам жұмыспен қамтылған. Алғаш ашылғанда кәсіпорынның өнім өндіру қуаты жылына 40 мың тоннаны құраса, 2018 жылы зауыттың екінші бөлігі іске қосылып, нәтижесі екі еселенген.
Сарысу ауданындағы йодталған ас тұзын өндіретін «Асыл Тұз» зауытында 60 адам екі ауысыммен жұмыс істейді. Кәсіпорынның жұмысы жүйелі. Ауданға қарасты Қамқалы ауылынан 4 жүк көлігі үздіксіз тұз тасиды. Зауытқа келген шикізат толық өңдеуден өтіп, сұрыпталады. Осылайша йодталған дайын өніп, дүкен сөрелерінен табылады.
Қазіргі таңда зауыт күніне 40-50 тонна тұз шығаруда. Бұл айына орта есеппен 1500 тоннаны құрайды. Сонымен қатар «Сарысуда жасалған» ас тұзы Ресей мен Украинаға да экспортталады. Ол үшін мемлекет тарапынан арнайы темір жол тұйығы тартылған. Нақтырақ айтқанда зауыт «Бизнестің жол картасы – 2025» бағдарламасы аясында инфрақұрылымды жүргізу бойынша облыстық үйлестіру комиссиясының оң қорытындысын алған.
Өткен жылдың өзінде сарысулық ас-тұзының 14 мыңға жуық тоннасы, яғни 2 мың вагоны алыс-жақын шетелге жөнелтілген.
Өңірлік коммуникациялар қызметі
