Ұлыстың ұлы күні – әз Наурыз мейрамы Жамбыл ауданында жоғары дәрежеде аталып өтуде. Аудан орталығы – Аса ауылында көпшілікке мерекелік көңіл күй сыйлау мақсатында концерттік бағдарлама ұйымдастырылып, ақ дастархан жайылды. Шараға аудан азаматтары белсенді қатысты. Тігілген киіз үйдің іші қазақи құндылықтарға, салт-дәстүрлеріміз бен әдет-ғұрыптарымызға сай безендірілді.
Жаңа жыл мерекесімен аудан әкімі Ерлан Қыдыралыұлы жұртшылықты құттықтап, қазақтың төл тарихымен біте қайнасқан асық ату, қол күрес, күрес, қошқар көтеру, арқан тартыс және кіші футбол, теннис, волейболдан өткен турнирлерді аралады.Аудандық орталық мешіттің алдына ағаш отырғызып, көпшілікпен бірге Алланың үйінде дұға тіледі.
Шарада қошқарды 60 мәрте көтерген ақбұлымдық балуан көпшіліктің қошеметіне иеленсе, асалық жасөспірім, 50 мәрте көтеріп, болашағынан үлкен үміт күттірді.
Аудан азаматтары ақбұлымдық балуанның күш-жігеріне тәнті болып үлгермеді. Алаңға шыққан асалық Ислам Тілеміс қошқарды 101 мәрте көтеріп, аудан басшысының ризашылығына бөленді. Өз кезегінде өңір басшысы жас балуанға көтерген серкесін тарту етті.
Жамбыл ауданы әкімдігінің баспасөз қызметі
