Өткен жылы Жамбыл облысы прокуратурасының бастамасымен «Қоғаммен байланыс» атты мемлекетаралық жобасы іске қосылған болатын. Ондағы мақсат-мемлекеттік органдар азаматтардың өтініштерін қарау кезінде заңдылықтың сақталуын, халықтың сұраныстарына ашық жауап беріп, жедел әрекет ету. Аталған жоба өз кезегінде қызмет бабында заң бұзушылықтарды анықтауға, тұрғындардың құқықтарын қорғауға сеп болып келеді.
«Қоғаммен байланыс» жобасы аясында Ұлбике ақын атындағы мәдениет орталығында ұйымдастырылған шараға келіп, өтініштерін білдірген азаматтар аз болған жоқ. Қоғамдық қабылдауға аудан прокуроры Жомарт Науатов, аудан әкімі Нұрбол Жүнісбеков, құқық қорғау және мемлекеттік органдардың басшылары мен қатар өзге де жауапты тұлғалар қатысты.
Қоғамдық қабылдау барысында 50-ге жуық азамат жауапты сала басшыларына өтініш-тілектерін білдіріп, құқықтық мәселелер бойынша заң көмегін алды.
Жалпы мұндай кездесулер халықтың құқықтық сауатын арттыруға, халық пен құқық қорғау және мемлекеттік органдары арасында өзара байланысты күшейтуге, сонымен қатар азаматтардың сенімін нығайтуға арналған.
