Мемлекеттік қызметшілердің міндеті мен жауапкершілігі жеңіл емес. Уақытпен санаспайтын, ешкіммен таласпайтын нағыз істің адамдары – осылар. Жұмыстары ауқымды, тынымсыз, тоқтаусыз болғанына қарамастан жымиып жүретін олардың тәртібі мен тәрбиесі – көпке үлгі.
Атқарған жұмысы ауқымды болса да жымиып жүретін, таудай ауыр тірлікті көңілді жүріп-ақ атқарып тастайтын азаматтың бірі – Ұланбел ауылдық округінің әкімі Еркебұлан Абасов. Ол 1991 жылы Жамбыл ауылында дүниеге келген. Тараз мемлекеттік көпсалалы колледжін «Техник – жолшы-құрылысшы», М.Х.Дулати атындағы Тараз мемлекеттік университетін «Көлік құрылысы – техника және технология» мамандықтары бойынша бітіріп, өзінің білім көкжиегін де кеңейткен азамат. Еңбек жолын 2011 жылы Жамбыл ауылдық округі әкімі аппаратында іс-жүргізуші болып бастаған. 2013-2017 жылдары аудан әкімдігі ішкі саясат бөлімі «Жастар ресурстық орталығы» коммуналдық мемлекеттік мекемесінің директоры қызметін абыроймен атқарды.
Осылайша, өзін жақсы қырынан көрсеткен, ұйымдастыру ісіне бейімін байқатқан жас маман ауданның бірінші басшыларының назарына ілікпей қалмады. Сол кездегі аудан әкімінің шешімімен 2017-2019 жылдары Хантау ауылдық округінің әкімі қызметіне жіберілді. Бір ауылдың аманатын арқалаған ауқымды жұмысты 26 жастағы азаматқа сеніп тапсырды. «Жас келсе іске» дегендей, Еркебұлан да білегін түріп жұмысқа кірісіп кетті. Хантау ауылында қандай өзекті мәселе бар болса шешуге күш салды. Кейбір ауқымды жобаларды аудандық, облыстық бюджет қаражатынан жүзеге асыруға ұсыныс берді, ықпал етті. Әйтеуір тыным тапқан жоқ. 2019-2021 жылдары «АБК Автодор – НС» жауапкершілігі шектеулі серіктестігінің диспетчері, аудан әкімдігі ішкі саясат бөлімі «Жастар ресурстық орталығы» коммуналдық мемлекеттік мекемесінің бөлім басшысы қызметін іскерлікпен атқара білді. 2021 жылдың шілде айынан бастап Ұланбел ауылдық округінің әкімі қызметін жоғары ұйымдастырушылықпен атқаруда. Алғашқысында аудандық мәслихат депутаттарының қолдауына ие болса, былтыр өткен сайлауда Мойынқұм ауылдық округінің тұрғындарының дауыс беруімен қызметін қайта жалғастырды. Өзін сайлаған халықтың аманатын ешқашан ұмытқан емес. Еркебұлан үнемі елдің қасында, тұрғындармен бірге. Сондықтан, көпшілік оның жұмысын бағалайды.
– Ұланбел ауылдық округіне отбасыммен көшіп барып, қызметімді атқарып жатырмын. Тұрғындардың көтерген мәселелерін назарға алып, көпшілігін уақтылы шешіп отырамыз. Ауылдың әр көшесін аралап, отбасылардың жағдайын толық білгенім – жұмысымды сапалы, әділ атқаруға ықпал етуде. Халыққа сапалы қызмет еткен сайын көңілімді қуаныш кернейді. Себебі, елдің алғысынан артық құндылық жоқ,- дейді Еркебұлан Абасов.
Есет ДОСАЛЫ.
Ұланбел ауылы
