«Zhambyl Invest»: өңірдің инвестициялық әлеуетін арттыруға бағытталған жұмыстар жалғасуда
Жамбыл облысында инвестициялық жобаларды сүйемелдеу жұмыстары жаңа деңгейге көтерілуде. Бүгінде «Zhambyl Invest» өңірдің инвесторларға арналған фронт-офисі ретінде «бір терезе» қағидаты бойынша қызмет көрсетіп, жобаларды келіссөз кезеңінен бастап іске қосылғанға дейін толық сүйемелдейді, деп хабарлайды baq-orda.kz.
2025 жылы ұйым инвесторлармен және бизнес өкілдерімен 495 кездесу өткізіп, нәтижесінде 26 меморандум мен ынтымақтастық туралы ниет хаттамасына қол қойылды. Сонымен қатар 8 экспорттық келісімшарт жасалып, өңір кәсіпорындарының өнімдерін сыртқы нарыққа шығару мүмкіндігі кеңейді.
Өткен жылы стратегиялық маңызы бар екі инвестициялық келісім рәсімделді. Оның бірі – жылына 3 млн тоннаға дейін өнім өндіретін металлургиялық зауыттың құрылысы болса, екіншісі – жылына 3 млн тоннаға дейін терең өңделген жүгері өнімдерін шығаратын зауыт жобасы.
Қазіргі уақытта жалпы құны 3,4 трлн теңгені құрайтын 30 инвестициялық жобадан тұратын пул қалыптастырылған. Бұл жобалар металлургия, химия өнеркәсібі, агроөнеркәсіптік кешен және энергетика сияқты негізгі салаларды қамтиды.
2026 жылы құны 700 млрд теңге болатын химиялық кешен құрылысы бойынша жаңа инвестициялық келісімге қол қою жоспарланған. Сонымен қатар қатты тұрмыстық қалдықтарды қайта өңдеу зауытын салу жобасы пысықталуда. Бұдан бөлек, жүгеріні терең өңдеу зауытының алғашқы кезеңін, бу-газ электр станциясын, ауыл шаруашылығы техникасын құрастыру және тамшылатып суару жүйелерін өндіру жобаларын іске қосу көзделіп отыр.
Жүргізіліп жатқан жұмыстар Жамбыл облысының инвестициялық тартымдылығын арттырып, жаңа өндірістер ашуға және өңір экономикасының тұрақты дамуына негіз қалайды.
