Жамбыл облысында онкологиялық көмекке жүгінушілер саны артты: медициналық қызмет сапасы жақсарып келеді
Жамбыл облысында онкологиялық қызметтің қолжетімділігі мен сапасын арттыру бағытындағы жұмыстар жүйелі түрде жалғасуда. Облыстық көпбейінді онкология және хирургия орталығы тұрғындарға мамандандырылған медициналық көмекті көрсетіп, ауруларды ерте анықтау және тиімді емдеу жұмыстарын күшейтіп келеді.
Бүгінде өңірде алғашқы медициналық-санитариялық көмек деңгейінде 21 онкологиялық кабинет, 22 маммологиялық кабинет және 167 қарау кабинеті жұмыс істейді. Бұл тұрғындардың тұрғылықты жерінде скринингтен өтіп, қажетті консультация алуына мүмкіндік береді.
2026 жылдың алғашқы алты айында облыстық онкология орталығының диспансерлік бөлімшесінде 22 мыңнан астам тұрғын қабылданды. Бұл өткен жылдың сәйкес кезеңімен салыстырғанда шамамен 10 пайызға жоғары. Мамандардың айтуынша, көрсеткіштің артуы халықтың профилактикалық тексерулерге белсенді қатысуымен және онкологиялық қырағылықтың күшеюімен байланысты.
Емдеу қызметінде де оң динамика байқалады. Жыл басынан бері тәулік бойғы стационарда 3,6 мыңнан астам пациент ем қабылдаса, күндізгі стационар қызметін мыңнан астам адам пайдаланды. Заманауи диагностика мен емдеу тәсілдерінің енгізілуі нәтижесінде пациенттерге көрсетілетін көмектің тиімділігі артып келеді.
Онкологиялық ауруларды анықтау барысында компьютерлік томография, магниттік-резонанстық томография, ПЭТ-КТ, иммуногистохимиялық және молекулалық-генетикалық зерттеулер кеңінен қолданылады. Бұл қатерлі ісіктерді нақты диагностикалауға және әр науқасқа жеке емдеу тактикасын таңдауға мүмкіндік береді.
Мамандардың айтуынша, онкологиялық аурулардың ерте анықталуы – табысты емнің негізгі кепілі. Сондықтан тұрғындарды профилактикалық тексерулерден уақытылы өтіп, денсаулықтағы кез келген өзгеріске бейжай қарамауға шақырады.
Жамбыл облыстық көпбейінді онкология және хирургия орталығы заманауи медициналық технологияларды енгізу арқылы тұрғындарға көрсетілетін онкологиялық көмектің сапасын одан әрі арттыру бағытындағы жұмыстарын жалғастырып келеді.
