Жамбыл облысының шаруалары «қыс шанасын жаз сайлап», мал азығын дайындауға әлдеқашан кірісіп кеткен. Осының нәтижесінде, бігінгі таңға дейін 800,8 мың тонна пішен орылған, – деп хабарлайды «shanyraqinfo.kz» ақпарат агенттігі.
Жалпы, алдын ала жасалған жоспар бойынша, облыста 2019-2020 жылдардағы мал қыстату науқанына 319,4 мың гектар жердің шөбі шабылуға тиіс. Бүгінгі күні оның 188,7 мың гектарына орақ түсіп, жоспар 52,6 пайызға орындалған. Осылайша, аймақта меже етіп қойылған 1 592,5 мың тонна пішеннің нақты дайындалғаны 800,8 мың тоннаға жетіп отыр. Бұл жоспардың 50,3 пайызын құрайды.
Ал, орылуы қажет 50 мың тонна пішендеменің 23,6 мың тоннасы дайындалып,бұл тұрғыдағы көрсеткіш 47,2 пайызды құрап отыр. Дәнді дақылдар орылып, дән бастырылуда. Орташа гектар түсімі 17,9 центнерден айналуда.
Бұл да болса жамбылдық шаруалардың ерте көктемнен іске кіріскенінің жемісі. Өйткені, биылғы көктемгі дала жұмыстарына 8,7 мың данадан астам ауыл шаруашылығы техникалары қатысқан. Ағымдағы жылдың өнімі үшін егілетін жаздық масақты дәнді, қант қызылшасы, майлы дақылдар, картоп дақылы және мал азығы дақылдарының қажетті тұқым көлемі 100 пайызға дайындалған.
Жалпы, облыс әкімдігі ауыл шаруашылығы басқармасының мамандары берген деректерге сүйенсек, облыс бойынша ауыл шаруашылығы мақсатындағы жердің көлемі 4,6 миллион гектарды құрайды екен. Оның ішінде 781,8 мың гектар егістік болса, суармалысы – 182,4 мың, көпжылдық екпелер – 3,9 мың, шабындық – 123,5 мың, жайылымдық – 3,5 миллион, басқа санаттағылары 139, 2 мың гектар.
Осы жылдың өнімі үшін ауыл шаруашылығы дақылдарының егіс алқабын 674 мың гектарға орналастыру арқылы жалпы көлемін өткен жылдағыдан 5,5 мың гектарға арттыру көзделген екен. Аудандар берген мәлімет бойынша ауыл шаруашылығы дақылдарының егістік көлемі 670,5 мың гектарды құрап отыр. Оның ішінде бүгінде дәнді және дәнді бұршақты дақылдар – 347,4 мың, майлы дақылдар – 61 мың, қант қызылшасы – 5,7 мың, картоп – 9,1 мың, көкөніс-бақша дақылдары – 46,8 мың, мал азығы дақылдары 200,6 мың гектар алқапта өсірілуде. Сонымен қатар шаруалар 2020 жылдың өнімі үшін 98,1 мың гектар сүр көтеруді жоспарласа,оның орындалуы 93,4 мың гектар көлемінде, яғни 95,2 пайызды құрап отыр екен.
