Жамбыл облысы бойынша Қылмыстық-атқару жүйесі департаментіне қарасты №67 мекемесінде сотталғандардың құқықтары мен заңды мүдделерінің сақталуын қамтамасыз ету, олардың өтініштері мен шағымдарын қарау, сондай-ақ жазаны өтеу жағдайларын зерделеу мақсатында мекеме аумағында сотталғандарды жеке қабылдау және тұрғын үй-жайларын аралау жұмыстары жүргізілді.
Іс-шараға Жамбыл облысы бойынша ҚАЖ департаментінің өзіндік қауіпсіздік тобының жедел уәкілі, әділет капитаны Айнакулов Бағжан Нұрсұлтанұлы, мекеме басшылығы және құрылымдық бөлімдердің қызметкерлері қатысты.
Аралау барысында сотталғандардың ұсталуының материалдық-тұрмыстық жағдайлары, санитариялық талаптардың сақталуы, медициналық қамтамасыз етілуі, еңбекпен қамтылуы және Қазақстан Республикасының қылмыстық-атқару заңнамасының талаптарының орындалуы зерделенді.
Сонымен қатар, сотталғандарды жеке қабылдау жүргізіліп, олардың құқықтық сипаттағы сұрақтары, әлеуметтік-тұрмыстық мәселелері, жазаны өтеу тәртібі мен шарттарына қатысты өтініштері тыңдалды. Көтерілген мәселелер бойынша қолданыстағы заңнама нормалары түсіндіріліп, жекелеген өтініштер бақылауға алынды.
Зерделеу барысында сотталғандардың құқықтарының сақталуына, заңдылық режимінің қамтамасыз етілуіне, қызметкерлердің қызметтік тәртібі мен кәсіби әдеп нормаларын сақтауына ерекше назар аударылды. Сонымен қатар, қылмыстық-атқару жүйесі мекемелерінде сыбайлас жемқорлық құқық бұзушылықтарының алдын алу және құқықтық тәртіпті нығайту мәселелері бойынша түсіндіру жұмыстары жүргізілді.
Мұндай іс-шаралар Қазақстан Республикасы Қылмыстық-атқару кодексінің талаптарына сәйкес сотталғандардың құқықтарын қорғауға, олардың өтініштерін уақтылы қарауға және мекеме қызметінің ашықтығын қамтамасыз етуге бағытталған.
Жамбыл облысы бойынша ҚАЖ департаменті сотталғандардың заңды құқықтары мен бостандықтарының сақталуын қамтамасыз ету және қылмыстық-атқару жүйесі қызметінің тиімділігін арттыру бағытындағы жұмыстарды тұрақты негізде жалғастыруда.
