Ақтөбеде 62 жастағы әйел интернет арқылы танысқан «шетелдік офицердің» сөзіне сеніп, 1 миллион теңгесінен айырылып қалды. Бұл туралы облыстық полиция хабарлады.
Тергеу мәліметінше, зейнеткер әлеуметтік желіде өзін АҚШ армиясының отставкадағы офицері ретінде таныстырған ер адаммен хат алмасқан. Біраз уақыт бойы олар жиі сөйлесіп, күдікті адам әйелдің сеніміне кірген.
Кейін ол өзін уақытша қаржылық қиындыққа тап болғанын айтып, Қазақстанға келген соң ақшаны толық қайтарып беретінін уәде еткен. Сеніп қалған әйел бірнеше рет банк арқылы аударым жасап, жалпы сомасы 1 миллион теңгені жіберген.
Ақша түскеннен кейін «офицер» байланысқа шықпай қойған. Осыдан кейін әйел алаяқтың құрбаны болғанын түсініп, полицияға жүгінген.
Қазір бұл дерек бойынша сотқа дейінгі тергеу жүріп жатыр.
Полиция тұрғындарды әлеуметтік желі арқылы танысқан бейтаныс адамдарға ақша жібермеуге, жеке және банк деректерін құпия сақтауға шақырды.
qandastar.kz порталы.
