Талас ауданында 63 жастан асқан ардагерлер арасында аудандық спартакиада өтті
Ұлы Отан соғысы Жеңісінің 77 жылдығы қарсаңында ұйымдастырылған ауданішілік спартакиадада ардагерлер дойбы, үстел теннисі, қол күресі, асық ату және дарст спорт түрлерінен өзара бақ сынасты. Аталған жарысқа Қаратау қаласы мен ауданға қарасты ауылдық округтерден келген ардагерлер қатысты.
Аудан әкімінің орынбасары Айтолқын Абдибекова спартакидаға қатысушыларды жарыстың салтанатты ашылуымен құттықтады. Сондай-ақ, сөз барысында ардагер спортшыларды осындай спорттық шараға белсене қатысып, өскелең ұрпаққа дәріптеуі де игі іс екенін тілге тиек етті. Одан бөлек, спорттық шараға арнайы шақыртылған облыстық ардагерлер кеңесінің төрағасы Еркінбек Солтыбаев осындай игі бастамаларды өткізуге мұрындық болған аудан әкімі Қанатбек Мәдібекке алғысын жеткізді.
Одан кейін сөз кезегі Талас аудандық ардагерлер кеңесінің төрағасы Жұмабек Әсемовке берілді.
— Бүгінгі ардагерлер арасында ұйымдастырылған спорттық жарыс ардагерлердің бірін-бірімен қарым-қатынас орнатып, бұқаралық спорттың дамуына септігін тигізері сөзсіз. Барлық ардагер спортшыларымызға сәттілік серік болсын, — деді аудандық ардагерлер кеңесінің төрағасы.
Жарыс қорытындысы бойынша үздік ойын өрнегін көрсеткен ардагерлерге дипломдар, медальдар және спартакаиаданың Бас демеушісі Мәди Болысбековтың атынан ақшалай сыйлықтар табыс етілді.
Алдағы уақытта достық қарым-қатынасты арттыру үшін бұл игілікті шара жалғасын табатын болады.
Талас ауданы әкімдігінің баспасөз қызметі