Сарысу ауданы бойынша «Балалардың құқықтарын қорғауды күшейту, тұрмыстық зорлық-зомбылыққа қарсы іс-қимыл және жасөспірімдер арасында құқық бұзушылықтың алдын алу» жөніндегі 2025 — 2026 жылдарға арналған жол картасына сәйкес құрылған жұмысшы топ мүшелері Саудакент ауылында жастармен кездесу өткізді.
Жиында аудан әкімі Сәкен Мамытов сөз сөйлеп, Мемлекет басшысы Қасым-Жомарт Тоқаевтың тапсырмасына сәйкес іске асып жатқан «Заң мен Тәртіп» жобасы аясында баланың құқықтарын қорғау мемлекеттік саясаттың басым бағыты болып табылатын, балалардың қылмысқа бармауы, тәртіп сақтауы және салауатты өмір сүруы қоғам үшін өте маңызды екенін тілге тиек етті.
Күн тәртібіндегі алғашқы мәселе бойынша «балалар мен жасөспірімдер арасындағы құқықбұзушылықтың алдын алу жұмыстары туралы» аудандық полиция бөлімі бастығының орынбасары Әбдіманап Шілманбетов баяндама жасады.
Күн тәртібіндегі екінші мәселе бойынша «Ауыл жастарының ахуалы туралы» Байқадам ауылдық округінің әкімі Мейіржан Өксікбаевтың есебі тыңдалды.
Аудан прокуроры Елдос Әмірхан заңды білу – өзіңді және өзгелерді қорғау деген сөз. Қауіпсіздікті сақтау, дұрыс шешім қабылдау, тәртіпке бағыну – нағыз парасатты адамның ісі. Бұл сіздерді мықты әрі сенімді тұлға етеді деп жастарға «Заң мен Тәртіп» қағидатын түсіндірді.
