«Тек көк форма киюге міндеттей алмайды»: министр мектеп формасының түсіне қатысты түсініктеме берді
Қазақстандағы мектептер оқушыларды тек көк түсті форма киюге міндеттей алмайды. Оқу-ағарту министрі Жұлдыз Сүлейменованың айтуынша, мектеп формасында көк және қара түстің екеуіне де рұқсат етіледі.
«Мектеп формасына қатысты негізгі ережелер бар. Көк және қара түстерге рұқсат етіледі. Оқушының мектеп формасымен келуі – белгіленген талап», – деді министр.
Журналист мектеп тек көк түсті таңдап, қара форма киген оқушыға шектеу қоя ала ма деп нақтылады. Министр бұған жол берілмейтінін айтты.
«Жоқ, олай болмайды. Мұндай мәселе болғанын білемін. Осыған байланысты нақты түсіндіру жұмыстарын жүргізіп, білім басқармаларымен жеке кеңес өткіздік. Қара түске де, көк түске де рұқсат етіледі», – деді Жұлдыз Сүлейменова.
Министрлік оқушының шаш үлгісін белгілемейді
Сүлейменова әлеуметтік желіде тараған оқушыларға рұқсат етілетін шаш үлгілері туралы ақпаратқа да тоқталды. Оның айтуынша, Оқу-ағарту министрлігі балалардың шаш үлгісін реттемейді.
Мектептер оқушының сыртқы келбетіне қатысты кейбір талаптарды өзінің ішкі тәртіп ережесінде белгілей алады. Алайда мұндай талаптар шектен шықпауы және баланы кемсітуге әкелмеуі керек.
«Оқушының сыртқы келбеті оқу процесіне кедергі келтірмеуі, ұқыпты болуы керек және бұл кемсітуге айналмауы қажет. Сонымен қатар біз шаш үлгісін немесе баланың сыртқы келбетін шамадан тыс регламенттеуді жоспарлап отырған жоқпыз», – деді министр.
Министрдің айтуынша, мектептерге формаға қатысты талаптар түсіндірілген. Ал талапты бұзған мектептерді жаппай жазалау министрліктің мақсаты емес.
«Барлығын жазалауға болады. Бірақ біздің түпкі мақсатымыз бұл емес. Біз түсіндіру жұмыстарын жүргізіп, қоғамдық әдепке қатысты жаңа тәсілдерді қалыптастыруымыз керек», – деді ол.
Мұғалімге жұмыстан кейін жазған ата-аналарға айыппұл салынбайды
Сүлейменова мұғалімдерге сабақтан кейін хабарласатын ата-аналарға айыппұл енгізу жоспарланбағанын да айтты.
Оның сөзінше, ата-аналар педагогтің жеке уақытына құрметпен қарап, шұғыл емес мәселелерді келесі күнге қалдырғаны дұрыс. Сабақтан кейін мұғалім келесі күнгі сабағына дайындалып, отбасына уақыт бөліп, демалуы қажет.
Министр бұл мәселеде нақты сағаттан гөрі хабарласудың себебіне мән беру керегін айтты. Себебі кей мектептерде екінші ауысымдағы сабақ кешкі сағат 20:00-ге дейін созылады.
«Егер мәселе шұғыл болса, әрине, мұғалімдер ата-аналарға көмектеседі. Ал күте алатын мәселені келесі күнге қалдыруға болады», – деді министр.
Оқу-ағарту министрлігі қажет болған жағдайда ата-аналар мен мұғалімдердің чаттағы қарым-қатынасын реттейтін бірыңғай талаптар әзірлеуге дайын.
