Tengrinews.kz
Көкшетау тұрғыны Юлия Данчук 40 жасында өмірінде үлкен өзгеріс жасауға бел буып, медициналық білім алуға түсті. Ол ҰБТ-дан 76 балл жинап, университеттің ақылы бөліміне қабылданған, деп хабарлайды turkystan.kz.
Tengri Life жазуынша, Юлия Ресейде дүниеге келген, ал 2008 жылдан бері Қазақстанда тұрады. Көкшетауға болашақ жарымен танысқаннан кейін көшіп келген.
Ол медициналық университетке түсу туралы шешімді бірден қабылдамағанын айтады. ҰБТ-ға дайындалуға небәрі бір ай уақыты болған. Әсіресе Қазақстан тарихы пәні қиындық туғызған, себебі ол мектепте Ресейде білім алғандықтан, бұл пәнді оқымаған.
«Мен шекті балды жинадым. Шынымды айтсам, оны жинаймын деп жоспарламаған едім. Қолымнан келгеннің бәрін істеймін, егер түсе алмасам, бұл мен үшін: «барымды салдым» деген сылтау болады деп ойладым. Бірақ мен оқуға түстім, сондықтан осындай видео шықты — бұлай боларын өзім де күтпеген едім», — дейді ол.
Юлияның алғашқы мамандығы – география және информатика пәнінің мұғалімі. Алайда бұл салада жұмыс істемеген. Соңғы он жылға жуық уақыт бойы нутрициологиямен айналысып, йога нұсқаушысы болып еңбек еткен.
Оның медицинаға қызығуына дәл осы тәжірибесі әсер еткен. Юлия адам ағзасының жұмыс істеу жүйесіне бұрыннан қызыққанын және денені біртұтас жүйе ретінде зерттеуді қалайтынын айтты.
«Жаттықтырушылықта бұл анатомия болса, нутрициологияда маған әрқашан мүшелердің жұмыс істеу процесі қызық болатын. Маған ағзаға тұтас жүйе ретінде қараған ұнайды», — деді ол.
Енді ол жалпы тәжірибе дәрігері мамандығы бойынша жеті жыл білім алуды жоспарлап отыр.
Юлияның бұл шешімін күйеуі мен үш баласы қолдаған. Балалары тіпті анасы оқуын аяқтаған кезде өздерінің нешеде болатынын есептеп қойған.
Оның студент атанғаны туралы видеосы әлеуметтік желіде кең тарап, 200 мыңнан астам қаралым жинаған. Пікір жазғандардың арасында 40-45 жастан кейін қайта оқуға түскендер де көп болған. Юлия өз оқиғасы басқа адамдарға да жігер бергеніне қуанышты екенін айтады.
«Көбісі 40-тан, тіпті 45-тен кейін де оқуға түсіп жатқандарын және бұған еш өкінбейтіндерін жазып жатыр. Яғни, мен оларды ынталандырғандай болдым: егер арманың болса, оған ұмтылу керек», — дейді ол.
Енді Көкшетау тұрғынын алда жеті жылдық оқу күтіп тұр. Ол жас мөлшері жаңа мақсатқа ұмтылуға кедергі болмауы керек екенін өз мысалымен көрсеткісі келеді.
Толық нұсқасына гиперсілтеме беруді ұмытпаңыз: https://turkystan.kz/article/287803-40-zasymda-qaita-student-atandym-koksetau-turgyny-kopten-bergi-armanyn-oryndady
