magnific.com
Ақтөбеде тұрғын үй төлемін көбейту үшін төрт баласы бар әйелмен жалған некеге тұрған әскери қызметкерге сот үкімі шықты. Тергеу дерегінше, ол жаңа отбасының құрамына әйелдің төрт баласын қосып, мемлекеттен 50 миллион теңгеден астам қаражат алған, деп хабарлайды turkystan.kz.
«Время» басылымының жазуынша, іс Ақтөбе гарнизонының әскери сотында қаралған. Сотталушы – 45 жастағы Азамат Қарабаев. Ол ҰҚК Шекара қызметінің Маңғыстау облысы бойынша департаментінде аса маңызды істер жөніндегі аға жедел уәкіл болып жұмыс істеген және подполковник шенінде болған.
Іс материалдарына сәйкес, Қарабаев тұрғын үй төлемін арттыру мақсатында алдымен өз әйелімен ажырасқан. Кейін төрт кәмелетке толмаған баласы бар әйел де күйеуімен некесін бұзып, Қарабаевпен ресми некеге тұрған.
Әскери қызметкер неке куәлігі мен төрт баланың құжаттарын жұмыс орнындағы тұрғын үй комиссиясына өткізген. Соның негізінде оған 50 миллион теңгеден астам тұрғын үй төлемі берілген.
Алынған қаржыға Қарабаев бұрынғы әйелінің туысынан пәтер сатып алған. Кейін мәміле бойынша түскен ақшаның негізгі бөлігі қайтадан Қарабаевтың өзіне қайтарылған.
Іс дерегінше, 3 миллион теңге бұрынғы енесіне, тағы 3 миллион теңге төрт баланың анасына беріліп, қалған 44,5 миллион теңге Қарабаевқа қайтарылған.
Осыдан кейін ол сатып алған пәтерін бұрынғы енесіне қайта сатқан. Артынша төрт баланың анасымен ажырасып, алғашқы әйелімен қайта некелескен. Сотта Қарабаев екінші некесін жалған деп мойындамаған. Оның сөзінше, әйелмен араларында шынайы қарым-қатынас болған.
«Ол маған жазып, қоңырау шалатын. Отбасында мәселелер барын, төрт кәмелетке толмаған баласы барын айтатын. Мен оған қолдау көрсеттім. Біз белсенді түрде хат жазысып жүрдік, кейін жақындасып кеттік. Өйткені ол менен тірек, үміт пен қолдау көрді», – деді сотталушы.
Алайда төрт баланың анасы сотта басқа нұсқаны айтты. Оның сөзінше, неке тек Қарабаевқа ақша алуға көмектесу үшін рәсімделген.
Әйелдің айтуынша, ресми некеде болған уақыт ішінде олар бірге тұрмаған. Қарабаев Ақтауда, ал өзі Қостанай облысында тұрған.
«Неке жалған болды», – деді ол сотта.
Әйел мемлекеттен 50 миллион теңгеден астам тұрғын үй төлемі алынғанын тергеу кезінде ғана білгенін айтқан. Сот Қарабаевты алаяқтық жасағаны үшін кінәлі деп танып, 6 жылға бас бостандығынан айырды. Сондай-ақ ол подполковник әскери шенінен айырылды. Бұдан бөлек, сот оны мемлекетке 43 миллион теңгеден астам қаражат қайтаруға міндеттеді.
Сот үкімі әзірге заңды күшіне енген жоқ.
Толық нұсқасына гиперсілтеме беруді ұмытпаңыз: https://turkystan.kz/article/287804-50-million-tenge-alu-usin-er-adam-ozinin-aielimen-azyrasyp-4-balasy-bar-zengesine-uilengen
