ФОРУМ

Атақты ойшыл Әбу Насыр әл Фараби: «Адамға ең бірінші білім емес, тәрбие керек. Тәрбиесіз берілген білім – адамзаттың қас жауы, ол келешекте оның өміріне қауіп әкеледі» деген екен.

Ұлтымызда «Ұяда не көрсең, ұшқанда соны ілесің» деген дана сөзі бар. Әрбір отбасы тәрбиеге ерекше көңіл бөлген. Өйткені, ата — ана отбасының негізгі діңгегі.

Бала әкеден ақыл, анадан мейірім алады. Адамның жеке басының алғашқы қалыптасуы отбасынан басталады. Ата — анаға баладан артық ешкім жоқ. Ата мен ана — бала тәрбиесінің қамқоршысы, өнегесі.

Бүгін аудандық мәдениет үйінде «Баланың бас ұстазы – ата-ана» атты аудандық ата-аналар форумы өтті.

Форумға Сарысу ауданы әкімдігі, аудандық полиция бөлімі, сондай-ақ ауылдық округ әкімдері, ардагерлер кеңесінің төрағалары мен мүшелері, білім беру ұйымдарының басшылары, ұстаздар және ата-аналар қатысты.

Сонымен қатар, барлық ауылдық округтегі мектеп ұжымы онлайн форматта зум платформасы арқылы қатысып отырды.

Форум білім беру мекемелерінің жетістіктеріне арналған көрмені тамашалаудан басталды.

Форум жұмысына аудан әкімінің міндетін атқарушы Жанғозы Жаркенов қатысып, сөз сөйледі. Ұлттың болашағы – ұрпақ тәрбиесі бірінші кезекте тұрған кезеңде өтіп жатқан форумның маңыздылығына тоқталды. Әке де, шеше де балаларының жан дүниесіне үңіліп, мінез құлқындағы ерекшеліктерді жете білген жөн екендігін, баланың бойына балалық жақсы қасиеттерді дарыту, жанында жүрген достарына дейін мән беру, бойында дарыны болса дамыту, дұрыс білім алуына жағдай жасау — ата-ананың басты парызы екендігін, балаға сапалы білім, саналы тәрбие берудегі басты тұлға мұғалім болса, ал, бала үшін бас ұстаз – ата-ана екендігін атап өтті.

Бұдан кейін, арнайы тақырыпқа сай, аудан прокурорының міндетін атқарушы Кемелхан Данияр Валиханұлы, аудандық білім бөлімінің басшысы Жарықбасов Жуаныш Халықбергенұлы, Сарысу аудандық полиция бөлімі бастығының орынбасары, полиция подполковнигі Шілменбетов Әбдіманап Әбдіәшімұлы хабарлама жасаса, аудандық ата-аналар комитетінің мүшесі, еңбек ардагері Әубәкіров Мұрат Қонашұлы өз ойын ортаға салды.

Форум барысында «Құқық бұзушылықтың алдын алу» тақырыбында арнайы бейнеролик, театрландырылған көрініс көрсетіліп, психологиялық тренингтер өткізілді.

Форумда қоғамды алаңдататын проблемалық мәселелер айтылып, талқыланды. Аудандық алқа билер кеңесінің төрағасы Қалмырза Жандарбек ең өзекті тақырыптың көтеріліп отырғанын айтып, өз пікірін білдірді.

Ата — ана мен мектеп өзара тығыз байланыста болып, балаға бірдей талап қойып отырса, елімізде жан — жақты дамыған, тәрбиелі, саналы ұрпақ көптеп шығатыны сөзсіз. Ертең жігерімізді құм қылып, жерге қарататын ұрпақ шықпасын десек, балаға кішкентайынан түзу тәрбие берейік, — деген оймен форум жұмысы қорытындыланды.

Сарысу ауданы әкімдігі