Тараз қаласы әкімінің міндетін атқарушы Гүлдана Жауынбекова 1 қазан – Халықаралық қарттар күніне орай Сейтхан Жошыбайұлын арнайы барып құттықтады.
Кездесу барысында қала әкімінің міндетін атқарушы ардақты қарияға ізгі тілегін білдіріп, зор денсаулық, ұзақ ғұмыр, отбасылық амандық және бақ-береке тіледі.
Сейтхан Жошыбайұлы – отандық кардиохирургия саласының дамуына елеулі үлес қосқан көрнекті ғалым, білікті кардиохирург, медицина ғылымдарының докторы, профессор, академик. Оның кәсіби жолы мен ғылыми еңбектері кейінгі ұрпаққа өнеге.
Қазақ халқында үлкенді сыйлау, қарияны құрметтеу – ежелден қалыптасқан асыл дәстүр. Осы ретте Гүлдана Жауынбекова аға буын өкілдерінің ел дамуына қосқан еңбегін атап өтіп, олардың өмірлік тәжірибесі мен тағылымды жолы жас ұрпақ үшін қашанда маңызды екенін жеткізді.
Өз кезегінде Сейтхан Жошыбайұлы көрсетілген құрметке ризашылығын білдіріп, ақжарма тілегін жеткізді.
