1 қазан – Халықаралық қарттар күніне орай «Белсенді ұзақ өмір» орталығында қазақ вальсінің королі, көрнекті композитор Шәмші Қалдаяқовтың шығармашылығына арналған «Әуенге арналған ғұмыр» атты концерттік кеш өтті.
Шара барысында облыс әкімінің бірінші орынбасары Нұржан Календеров пен облыстық ардагерлер кеңесінің төрағасы, қоғам қайраткері Еркінбек Солтыбаев сөз сөйлеп, бұл күннің маңызына тоқталды. Аға буын өкілдеріне көрсетілетін құрмет пен қамқорлықтың мәнін атап өтіп, ардагерлерді мерекемен құттықтады.
Мерекелік кеште Шәмші Қалдаяқовтың ел жүрегінен орын алған «Теріскей», «Ақ сұңқарым», «Ақ маңдайлым», «Қуаныш вальсі», «Мойынқұмда», «Тамды аруы», «Сыған серенадасы» сынды әндері орындалып, ұлттық өнеріміздің алтын қорына айналған шығармалар қайта жаңғырды.
Сонымен қатар концерттік бағдарламада би ұжымдары мен ұлттық аспаптар ансамблінің өнері ұсынылып, көрермендерге көтеріңкі көңіл күй сыйлады.
Кештің басты ерекшелігі – сахна төрінде де, көрермендер қатарында да аға буын өкілдерінің болуы. Шәмші әндері арқылы жастық шақтың жарқын естеліктері жаңғырып, ұрпақтар сабақтастығы айқын көрініс тапты.
