Халықаралық қарттар күні – аға буынның ел мен қоғамға сіңірген еңбегін бағалап, олардың өмір жолы мен өнегесін ұлықтайтын тағылымы терең мереке. Осы айтулы күнге орай медицина саласының ардагері, білікті хирург, медицина ғылымдарының докторы, профессор, Нью-Йорк Ғылым академиясының және Қазақстан Журналистер одағының мүшесі Сағындық Ордабековке құрмет көрсетілді.
Саналы ғұмырын адам денсаулығын қорғауға арнаған Сағындық Ордабековтің еңбек жолы Жамбыл өңірінің медицина саласының қалыптасуы мен даму тарихымен сабақтас.
Ол 1975 жылы Жамбыл облыстық ауруханасында дәрігер-хирург болып еңбек жолын бастап, кейін Жамбыл қалалық жедел жәрдем ауруханасында қызмет атқарды. Ал 1989 жылдан бастап жиырма жылға жуық уақыт өңірдің бас хирургі қызметін атқарып, хирургия саласының дамуына айрықша үлес қосты.
Ардагер дәрігердің кәсіби ізденісі практикалық медицинамен ғана шектелген жоқ. Ғылыми-педагогикалық бағытта да жемісті еңбек етіп, жоғары оқу орындарында дәріс оқыды, медицина мамандарын даярлауға атсалысты. Ғылым мен тәжірибені ұштастырған кәсіби жолы талай жас маманға бағыт-бағдар беріп, медицина саласындағы сабақтастықтың қалыптасуына ықпал етті.
Кездесу барысында ардагерге зор денсаулық, ұзақ ғұмыр тілеп, ел денсаулығын сақтау жолындағы көп жылғы еңбегі үшін алғыс білдірілді.
Аға буынның өнегелі жолын ұлықтау – өткенге тағзым ғана емес, ұрпақтар сабақтастығын жалғаудың маңызды көрінісі. Өйткені медицинадағы кәсіби мектептің қалыптасуына өлшеусіз үлес қосқан ардагерлердің тәжірибесі мен өмірлік ұстанымы – кейінгі буын үшін баға жетпес мұра.
