Жамбыл облысы әкімдігінің мәдениет және тілдерді дамыту басқармасының бастамасымен Қордай ауданында «Тіл – достықтың дәнекері» атты тіл фестивалі өтті.
Фестивальдің негізгі мақсаты – қазақтілінің мемлекеттік тіл ретіндегі мәртебесін арттыру, оның қоғамдағы қолданыс аясын кеңейту және тілдік бірлікті нығайту.
Іс-шара Қордай аудандық мәдениет үйінің алаңында театрландырылған қойылыммен басталды. Қойылым арқылы тілдің ұлт руханиятындағы орны, халықтар арасындағы достық пен татулықтың маңызы көркем түрде көрерменгеұсынылды.
Шара барысында қатысушыларға ұлттық құндылықтар мен тіл мәдениетін насихаттайтын көрмелер мен ақпараттық материалдар таныстырылып, аудан көлемінде мемлекеттік тіл саясатын жүргізу бағытында атқарылып жатқан жұмыстар туралы арнайы бейнеролик көрсетілді.
Фестиваль аясында жастарға рухани тәрбие беру, ұлттық мәдениет пен тіл құндылықтарын дәріптеу мақсатында театрландырылған көріністер ұсынылды. Сондай-ақ, өнерпаздардың қатысуымен концерттік бағдарлама ұйымдастырылып, халық әндері мен көркемсөз композициялары көрермен назарына ұсынылды.
Концерттік бағдарламада «Ойжайлау» фольклорлық ансамблі мен М.Төлебаев атындағы өнер мектебінің шәкірттері өнер көрсетіп, қазақтың дәстүрлі өнерін насихаттады. Ақын Е.Боранбектің «Тілім менің» шығармасы орындалып, мемлекеттік тілдің мәртебесі мен рухани құндылығы кеңінен дәріптелді.
Фестиваль қорытындысында М.Шахановтың шығармасы негізінде дайындалған «Рух пен тіл» әдеби-музыкалық композициясы ұсынылып, тіл тағдыры мен ұлт болашағының өзара сабақтастығы көркем түрде бейнеленді.
«Тіл – достықтың дәнекері» фестивалі мемлекеттік тілдің қоғамдық маңызын насихаттап қана қоймай, түрлі этнос өкілдерін ортақ құндылықтар төңірегіне топтастырып, достық пен бірлікті нығайтуға бағытталған тағылымды мәдени шара болды.