Облыс орталығынан аса қуанышты хабар жетті. Тарихы терең жайылған шаһарда енді заманауи «Салтанат сарайы» салынады. Өңір мәдениеті мен өнерін дамытуға қызмет ететін «Салтанат сарайы» Тараз қаласы әкімдігінің құрылыс бөлімінің тапсырысымен Балауса шағын ауданында құрылысы басталған нысан 1300 келушіні қабылдауға арналған. Жаңа «Салтанат сарайы» құрылысының басталуына арнайы келіп, капсула салу рәсіміне қатысқан облыс әкімі Ербол Қарашөкеев Мемлекет басшысы Қасым-Жомарт Тоқаевтың тапсырмасымен жүзеге асырылып, оған «Қазфосфат» жауапкершілігі шектеулі серіктестігі қаржылай қолдау көрсеткенін айтып, тұрғындар атынан ризашылығын білдірді.
– Қадірлі қауым! Заман ауысады, ырыс жұғысады. Жаңа кезең өз ерекшелігімен келеді. Сәт сайын жаңашылдық орнаған дәуірде ғұмыр кешіп, мемлекеттің дамуына бірге куә болып отырмыз.
Бүгінде Тараз қаласында халық саны өсіп, мәдени іс-шаралардың ауқымы кеңейді. Республикалық және халықаралық деңгейдегі концерттер мен ірі мәдени жобаларды өткізу үшін жаңа нысан қажет. Осы қажеттілікті ескере отырып, бүгін жаңа «Салтанат сарайының» құрылысын бастап отырмыз. Бұл нысан заманауи талаптарға сай жабдықталып, ірі концерттерді, театрландырылған қойылымдарды, шығармашылық кештерді және халықаралық деңгейдегі мәдени іс-шараларды өткізуге мүмкіндік береді. Сонымен қатар мұнда балалар мен жастардың шығармашылықпен айналысуына, өнер ұжымдарының жұмыс істеуіне және жаңа мәдени жобалардың жүзеге асуына жағдай жасалады. Қазіргі таңда қаладағы ең ірі концерттік зал 951 көрерменге арналған. Аталған ғимараттың құрылысы 1980 жылы жүргізіліп, 2017 жылы қайта жаңғыртылған.
Мемлекет басшысы Қасым-Жомарт Кемелұлы Тоқаев мәдениет пен өнерді дамытуға, азаматтарға қолайлы орта қалыптастыруға ерекше мән беріп келеді. Бүгінгі жоба – осы бағыттағы өңірлік жұмыстардың нәтижесі. Ендігі міндет – құрылысты белгіленген мерзімде сапалы аяқтап, нысанды қала тұрғындарының игілігіне беру.
Тарихы екі мың жылдан асатын Тараз үшін мәдениет пен өнердің орны әрдайым ерекше. Сондықтан көне шаһардың тарихи келбетіне сай заманауи мәдени инфрақұрылым қалыптастыру – бүгінгі күннің нақты міндеттерінің бірі.
Жаңа сарайдың құрылысы қаланың мәдени инфрақұрылымын жаңартып қана қоймай, Тараздың туристік тартымдылығында арттырады. Көне шаһарға келетін қонақтар тарихи орындармен қатар, заманауи мәдени нысандарды да тамашалайтын болады.
Бұл жобаның артында ең алдымен Тараздың тұрғындары тұр. Сондықтан жаңа Салтанат сарайы халыққа ұзақ жылдар бойы қызмет етуі тиіс. Осы сарайдың төрінде елдің еңсесін көтеретін ән шырқалсын, ұлттық өнеріміз ұлықталсын, талантты жастарымыздың жаңа буыны қалыптассын! Жаңа нысан Тараздың мәдени өміріне жаңа серпін беріп, шаһарымыздың ажарын арттыра берсін!
Құрылыс жұмыстарына сәттілік тілеймін! Еліміз аман, жұртымыз тыныш болсын! Таразымыз көркейіп, Жамбыл өңірінің мерейі арта берсін! – деді өңір басшысы Ербол Шырақпайұлы.
Халықтың игілігіне арналған жаңа іске сәттілік тілеген облыстық мәслихаттың төрағасы Абдалы Нұралиев ұлт өнері мен ел мәдениетінің дамуына тілектестік білдірді.
– Бүгін – тарихы терең, тағылымы мол Тараз қаласының қоғамдық-мәдени өміріне жаңа серпін беретін маңызды нысанның құрылысына бастау беріп отырған ерекше күн. Екі мың жылдан астам тарихы бар Тараз – өткенін қадірлеп, келешекке нық қадам басып келе жатқан көне шаһар. Бүгінде қаланың сәулеттік келбеті жаңарып, тұрғындарға қолайлы орта қалыптастыратын заманауи нысандар бой көтеруде. Мұндай жобалар қаланың инфрақұрылымын жетілдіріп қана қоймай, оның мәдени және қоғамдық әлеуетін арттыруға да мүмкіндік береді.
Бүгінгі бастамада Президент Қасым-Жомарт Тоқаевтың тапсырмасына орай «Қазфосфат» жауапкершілігі шектеулі серіктестігінің зор қолдауы тұр. Осы мүмкіндік үшін барша жамбылдықтардың атынан зор алғысымды айтамын.
Бұл ғимарат Тараздың сәулеттік келбетіне көрік қосып, облыстың мәдени және қоғамдық өміріндегі маңызды орталықтардың біріне айналсын! Жаңа салтанат сарайы ел игілігіне қызмет етіп, талай қуанышты күндердің куәсі болсын! Құрылыстың іргетасы берік, еңбегі жемісті, нәтижесі баянды болсын! Ісіміз оңынан басталып, абыроймен аяқталсын! – деді ақжарма тілегін ақтарған Абдалы Тоқбергенұлы. Жаңа істің бастауына Қазақстан Республикасының Еңбек сіңірген қайраткері, Мәдениет саласының үздігі Асылхан Шүңіреков те жүрекжарды лебізін жеткізді.
Құрылысы 19 айға жоспарланған жобаның құны – 18,5 миллиард теңге. Арнайы капсула салынып, құрылысы салтанатты түрде бастау алған нысан 4,9 гектар жерге салынады. Жалпы ауданы 12 967,3 шаршы метрді алып жатыр. Жоба құны 18,5 миллиард теңгені құрайтын жоба құрылысы 19 ай ішінде аяқталады деп көзделіп отыр.
Есет ДОСАЛЫ,
Мойынқұм ауданы
