11 қаңтарда сағат 12:00 шамасында Сергейдің үйіне тәртіп сақшылары келіп, жаппай тәртіпсіздік кезінде түсірілген суреттерді көрсетеміз деп полиция бөлімшесіне алып кеткен. Ол тергеуге шақырту қағазын сұрағанда, қолын қайырып, аяқ киімін кигізбестен көлікке салып алған көрінеді.
«Көліктің ішіне жатқызып ұрып-соғып, ұялы телефонымды сұрады. Телефоным үйде қалып қойғандықтан олар әйеліме барып, телефоным мен жазғы аяқ киімімді алып келді. Тағы да ұрып, ұялы телефонымның құпиясөзін сұрады, — дейді Сергей Шутов.
Нағыз азап Атырау қалалық полиция басқармасының спорт залында басталған. Сергейдің айтуынша, оны тоңқайтып, жан-жағына қарамауды бұйырған. Кейін оны қорлап, бірнеше рет отырып-тұрғызыпты.
«Барлығын жуынатын бөлмеде ұрып жатты. Дауыстарын естідім. Менен тергеуші митинг туралы сұрады. Сұрақтарына жауап бердім. Кейін мені жуынатын бөлмеге апарып, аяусыз ұрып-соқты. Менен тағы да митингке баратын-бармайтынымды сұрады. Бүкіл денем ауырып, олардың тоқтауын сұрадым. Тоқтамай, ұра берді. Кейін осы бөлмеге тағы да алып келді. Бірақ тұрған жерімнен жуынатын бөлмеге дейін ит сияқты жүруімді талап етті», — дейді Сергей Шутов.
Оған бірнеше қағаздарға қол қойғызып, бірақ оқуға рұқсат етпеген. Кейін оны әкімшілік қамауға алынғандарға арналған орынға қамаған. Тар бөлмеде 15 адам болып жатқан. Сүйектен өтетін суықтан қалшылдап тоңып, жарақаты асқынған. Сол күні әкелінген 15 адамның барлығы да таяқ жегенін айтады. Тіпті бөлмеге жедел жәрдем шақыртуға тура келген.
Келесі күні прокуратура қызметкерлері келіп, тағы да митингқа қатысты сұрақтар қойып, кейін әкімшілік сот Сергей Шутовқа 2 тәулік әкімшілік қамауға алу жазасын берген. Прокурорда Сергейдің жарақаты туралы жақ ашпаған. Тіпті оны 15 тәулікке қамауды сұраған.
Қазір Сергей үйінде ем алып жатыр. Өзі қаралған мемлекеттік ауруханалар Сергейдің қан аралас дәретін көрсе де, денсаулығы жақсы деп жазып берген. Ол соңына дейін барып, полиция қызметкерлерін жазалатпақшы.
Сергей Шутов осыған байланысты полицияға арыз жазды. Бірақ Атырау облыстық Полиция департаментінің өкілдері оның айтқандарымен келіспей отыр. ПД бастығының орынбасары Берік Амангелді ұсталғандарды ұрып-соғу дерегін үзілді-кесілді жоққа шығарды. Тәртіп сақшыларынан осыдан өзге ақпарат алу мүмкін болмай тұр.
